moldvarpa á malbikinu

Ég fæ alltaf gjöf...

2011-05-05T18:10:00.002Z

Af því að mér finnst óskaplega gaman að fá gjafir þá hef ég á undanförnum árum ákveðið að sameina nokkra hluti sem gleðja mig afskaplega mikið og gef sjálfri mér því alltaf afmælis-, jóla- og tækifærisgjafir. Það þarf svo varla að nefna það að þessar gjafir eru ávallt kjólar og/eða skór. Skartgripir fá þó stundum að fljóta með.

Heimildalestur

2011-04-29T06:38:00.001Z

Er að lesa þessa núna. Hún er á þýsku!

Lappastutt!

2011-04-18T17:30:00.005Z

Það verður víst seint sagt um mig að ég sé fótleggjalöng

Lasagnaleiði

2011-04-13T17:16:00.003Z

Eldaði prýðisgott lasagna í síðustu viku (þó ég segi sjálf frá). Uppskriftin var sögð fyrir fjóra svo ég hafði hugsað mér að eiga smá í nesti, kannski í hádegi og annan kvöldmat. Neyðin kennir jú námsmanninum að borða afganga!
Þetta reyndist hins vegar vera lygi því nú á sjötta lasagnadegi sér varla högg á vatni og ég er komin með svokallað lasagnaóþol.

sænska skattaskýrslan mín!

2011-03-29T16:03:00.004Z

Átti hið árlega samtal við starfsmann Skatteverket í Stokkhólmi og endar samtalið alltaf eins;...„já, ég veit að ég fæ enga skattaskýrslu ef ég hef ekkert verið að vinna og þar af leiðandi ekki borgað neina skatta, en íslenski skatturinn þarf að fá það skriflegt“. „En hvað það er fíflalegt!“ svarar starfsmaðurinn og heldur áfram „ég get ekki prentað neitt út þar sem það er ekki neitt skráð á þig“. „Umm, ég veit, en síðustu ár hefur bara verið prentuð út skjámyndin sem sýnir að ég eigi enga sænska skattaskýrslu“ svara ég. „Og dugar þeim það?“ spyr starfsmaðurinn mjög hissa. „Uhh, já ef þú bara stimplar á blaðið“ segi ég og samsinni starfsmanninum sem hristir bara höfuðið yfir þessum kjánagangi íslenska skattsins.

Fann'etta, á'etta!

2011-02-01T13:30:00.008Z

Finnst að „sá á fund sem finnur“ reglan eigi að vera algild...alltaf!
Fann þetta í dag

en það var falið inn í þessu

Líður nú alveg eins og Indiana Jones en hann þarf einmitt alltaf að láta allt fínt sem hann finnur á safn.

P.s. Fyrir þá sem ekki vita hver Indiana Jones er, þá fylgir hér mynd til glöggvunar.

Spegill, spegill herm þú mér...

2010-11-28T10:29:00.004Z

Til bjargar geðheilsunni svona í morgunsárið (á hverjum morgni) þá ákvað ég að skella upp síðum spegli, nálægt fataskápnum. Alltaf betra að sjá dress dagsins svona í heild sinni áður en haldið er út úr húsi, sérstaklega til að atvik eins og að vera með kjólinn ofan í sokkabuxunum endurtaki sig ekki!

"Do it yourself" komplexar!

2010-11-16T13:22:00.014Z

Í gegnum tíðina, aðallega síðastliðin tvö ár, hef ég oft fengið misgóð sparnaðarráð. Um daginn fékk ég eitt slíkt þegar ég keypti mér gallabuxur sem (eins og venjulega) voru of síðar á mig. Haldin undarlegum "Do it yourself" komplexum ákvað ég að fara ekki með þær til fagfólks heldur spara og stytta þær sjálf! Að vísu ekkert mál fyrir saumavélafæra manneskju (s.s. mig) en þó vandast málið þegar rennilás kemur við sögu, sérstaklega þar sem rennilásaskipti geta kostað mig geðheilsuna allavega svona eina kvöldstund eða svo.

Þessu var ég þó greinilega öllu búin að gleyma (enda búin að búa saumavélalaus í tvö ár) og áður en ég vissi af voru rennilásarnir úr og nýir og styttri á leið í.

Eftir smá streð og nokkrum talningum upp á tíu með tilheyrandi blótsyrðum tókst mér loks að troða báðum lásunum í. Voila!!

The mad scientist!

2010-11-07T19:22:00.008Z

Er komin aftur í hvítan slopp

og með vinnuborð

og fullt fullt af allskonar mishættulegu dóti.

Þjóðminjasafni Íslands finnst ég greinilega mjög traustvekjandi týpa!

Vegna niðurskurðar á Þjóðminjasafninu þá þarf ég að vefja mína eigin bómullarpinna! Djóók, finnst bara töff að geta sagst vafið mína eigin...enda eru þeir líka svo fínir.

Aðrir voru kannski aðeins minna fínir

Prinsessan sem átti 365 kjóla?

2010-10-24T18:16:00.006Z

á ekki alveg við mig, ennþá. Gerði þau miklu mistök um daginn að telja alla kjólana mína (greinilegt hver er búin að vera atvinnulaus!) og þó ég slái nú prinsessunni, í sögu þeirri sem fyrirsögnin vísar í, ekki við var niðurstaðan samt pínu sjokkerandi svo ég ætla bara að halda henni út af fyrir mig.

Hins vegar komst ég að þeirri skemmtilegu staðreynd (reyni hvað ég get að fegra þetta mál) að ég á a.m.k. tvo kjóla í hverjum lit.

Oh it's such a purple day...

2010-10-20T11:44:00.003Z

helgar alla daga!

2010-10-16T17:34:00.002Z

Þegar maður er atvinnulaus þá getur maður;

- farið í eins langan hádegismat og maður vill.
- farið og heimsótt vini og vandamenn í þeirra vinnu.
- farið í sund fyrir hádegi og aftur eftir hádegi.
- verið heima í náttfötunum allan daginn.
- lesið morgunblöðin hvenær sem er dagsins.
- sofið frameftir morgni/degi.
- stundað dagdrykkju.
og margt margt fleira...

með nesti og nýja skó

2010-09-28T20:14:00.003Z

Í ævintýrum fá alltaf allir nesti og nýja skó áður en haldið er út í heim á vit ævintýranna. Því ákvað ég að kaupa mér nýja skó þrátt fyrir að enn séu nokkrir mánuðir í að ég haldi aftur út í heim. En þar sem ég hef ákveðið að lenda í fullt af skemmtilegum ævintýrum þangað til segir það sig sjálft að nýjir skór eru bráðnauðsynlegir!

Haustið...

2010-09-14T15:09:00.004Z

Já, haustið mætti bara á svæðið í gærmorgun með sínum fögru litum og jökulinn hvítann!

horfið er nú sumarið og...

2010-09-04T00:03:00.013Z

í sumar var bakað af miklum móð í Langadal og voru þar ekki minna en tvær sortir á boðstólnum svona á venjulegum degi milli þess sem rútur og smábílar festu síg í ánum!

Svo fengu líka allir sem vildu kerruskutl yfir Krossá

Um versló hitti ég svo loksins fræðafélagsstúlkur í þeim tilgangi þó að kveðja Bryn sem er að fara að gifta sig á Ítalíu og flytja til Noregs.

Ég skemmti mér svona líka konunglega!

Bryn fannst líka rosa gaman!

Ingu fannst þetta greinilega ógeðslega gaman!

Sandra var reyndar sárlasin en fannst samt gaman, sko sjáið bara!

Um síðustu helgi fannst mér svo ekki seinna vænna en að kynna mér aðeins aðstæður á fimmvörðuhálsi, athuga með hitastig á hrauninu og svona - enda búin að ljúga að fullt að fólki í sumar að þetta sé ekkert mál að rölta þarna upp...taki bara smá stund! Dröslaði mér því þarna upp (með dyggri aðstoð reyndar) á föstudaginn og skoðaði hraunið og gígana, labbaði upp á annan þeirra og komst að því að ég er ekki búin að segja nema hálfa lygi.

Komst svo niður aftur án þess að það þyrfti að halda á mér, er frekar stolt af því þrátt fyrir freistandi boð. Í vetur mun ég hins vegar stunda hot jóga af krafti svo vandræðaleg másandi móment verði úr sögunni næsta sumar!

Niðurstaðan úr þessum könnunarleiðangri mínum er s.s. sú að það tekur aðeins meira en smá stund að "rölta" upp á hálsinn en hraunið og gígarnir eru hrikalega flott svo það svíkur engann að fara þetta. Vona bara að allir þeir sem ég er búin að ljúga að gleymi því þegar þeir sjá þetta :)

Alvöru sveitavargur?

2010-08-25T18:29:00.002Z

Hvað það er fagurt í Þórsmörkinni...

2010-06-27T16:48:00.004Z

Þá er ég mætt í Mörkina þar sem ég blaðra útlensku og keyri traktor daginn út og inn. Langidalur er fallegur að vanda þrátt fyrir öskufall en dalurinn og reyndar Þórsmörkin öll kemur ótrúlega vel út úr þessum hamförum.

Hér er grasið slegið af miklum móð enda heyrist grasið nánast spretta!

Fékk svo að reyna mig við Krossá í síðustu viku þegar lítill jepplingur náði að drekkja sér í ánni. Fólkið komst sem betur fer heilt á húfi úr ánni en erfiðara gekk að ná bílnum upp úr. Krossáin vaðin upp að mitti til að leita að festu fyrir kaðal en ekkert að finna undir fjandans bílnum til að festa sveran kaðal í svo við skálaverjur fengum Binna í Húsadal til að koma á vörubílnum með sína spotta og tókst mér svo loksins með góðri aðstoð Binna að draga bílinn upp úr ánni á traktornum. Þá var samt fjörið ekki alveg búið því þegar búið var að ná bílnum upp úr ánni rétt eftir miðnætti þá var hann dreginn upp á plan og látinn standa þar. Þegar skálverjum fóru svo að spá í að koma sér í koju eða um hálftvöleytið en þá fór allt af stað í bílskrattanum, bílflautan, ljósin og hvaðeina og bergmálaði flautan svo um dalinn að allir gestir í skála og á tjaldstæði vöknuðu fyrir utan fólkið sem var á bílnum, en þau þurfti Margrét skálaverja að vekja!
Til að þagga niður í fjandans bílnum var brugðið á það ráð og kippa rafgeyminum úr sambandi en var það hægara sagt en gert þar sem öll verkfæri til slíks voru í bílnum hjá Brodda! En það hafðist með smá hugarflugi og meira mausi og hélt bíllinn kjafti eftir það.

Ennþá geymist það mér í minni...

2010-06-11T18:19:00.005Z

Hér ætla ég að vera i sumar (eitthvað allavega), flagga, syngja ættjarðarsöngva, brosa og vera skemmtileg!!!
Ég verð s.s. skálavörður í Langadal (fyrir þá sem þekkja ekki myndina) í sumar og eru allir velkomnir í heimsókn.

Verð þó kannski eitthvað líka á þessum slóðum...

Stal þessari mynd úr Laugunum af netinu og grunar að þetta sé ca. 15 ára gömul mynd. Finnst hún dásamleg sérstaklega þar sem Guggan stendur þarna svo sæt og fín á bílaplaninu!

Last days of Sthlm

2010-06-07T21:42:00.008Z

Síðustu dagar mínir hér í Svíaríki hafa liðið alltof of fljótt þrátt fyrir að ég hlakki mikið til að fara heim. En ég kem aftur, ég kem alltaf aftur!

Íslendingar í Júrópartý

Erna, Tinna og Auður eiga eins hatta!

Ég og Inga fórum á STARK Sommarfest

Og líka í Raclett matarboð hjá Cissi og Pontusi

En þetta er þó best, Frosin Margaríta!

sællegir timar og síðara hár

2010-05-30T11:01:00.003Z

Dreymdi í nótt að ég fór í klippingu og kom út með sítt hár!

Rottur og rómantískir kjólar

2010-05-28T19:12:00.004Z

Á leiðinni heim í dag/kvöld sá ég einn nágranna minn hér á Lappis en það er rotta sem mér skilst að búi í beði við reiðhjólaskýli ská á móti mér. Ekki amalegir nágrannar hér á Lappis! Ég er frekar svekkt yfir að hafa ekki frekar íkorna búandi ská á móti mér, hef ekki einu sinni séð þá í trénu fyrir utan en það er allt fullt af þeim fyrir utan deildina svo ég kjái bara til þeirra þar. Annars segir Auður að íkornar séu ekkert betri en rottur, þeir séu bara með betri kynningarfulltrúa!

Ætli rottur væru krúttlegri ef þær væru með loðið skott?

Af því að sumarið er komið þá er mig búið að langa mikið í rómantískan sumarkjól og hlaupa niður grasbrekku.

Í tilefni af því að ég fyllti ár nú í mai þá splæsti ég á mig einum slíkum. Hversu skynsamleg fjárfesting þetta reynist vera er óvíst þar sem ég fer á fjöll eftir ca. hálfan mánuð og verð þar langt fram á haust. En hver segir svo sem að afmælisgjafir eigi að vera skynsamlegar? Allavega ekki ég!

sólin leikur um mig

2010-05-23T09:53:00.006Z

hér í Stokkhólmi (ok smá rigning núna) og ég hlusta á geitungana fyrir utan gluggann minn sem reyna að finna sér leið inn til mín, en ég er búin að sjá við þeim þar sem ég opna ekki lengur gluggana!
En öll þessi sól hefur líka í för með sér nokkuð óviljandi en frekar kúl (að mínu mati) brúnkuför.

Notaði líka tækifærið í góða veðrinu til að kíkja á fornleifauppgröft í Korsnäs en það er sami staður og ég og Inga grófum á í haust. Sigtablætið fékk líka smá útrás í leiðnni.

Ég fór líka upp í sumarbústað/hús með Ingu, Elinu og Cissi fyrir stuttu (áður en sólin kom) þar sem Inga aflakló veiddi væna geddu sem hún myrti síðan og át!

Fór líka til Gotlands í apríl en Gotlendingar tala og skrifa skrítna sænsku.

Afmælið mitt!

2010-05-05T11:43:00.005Z

Í dag ákvað ég að vera í fríi í tilefni dagsins og gera bara skemmtilega hluti. Eins og er, er ég búin að taka til, vaska upp, klippa táneglurnar, hringja í bankann og þarf núna að skila bók á bókasafnið og athuga hvort ég get ekki kjaftað mig út úr sektinni (gleymdi að skila henni í síðustu viku) svo ég er að spá í að hætta að ákveða svona fyrirfram og athuga bara næst hvort skemmtilegheitin elti mig ekki bara uppi!

Ég batt miklar vonir við að Gröna Lund gæti hresst mig við með svo sem eins og einni salíbunu í rússibana EN neeei, Gröna Lund er lokað í dag. Það er hinsvegar opið á morgun en það gerir ekki mikið fyrir mig því ég á afmæli í dag en ekki á morgun!

Þetta ætti nú að lagast þar sem ég fæ indverskan mat í kvöld og Inga og Auður verða með heimatilbúin skemmtiatriði fyrir mig í allt kvöld. Svo bíð ég líka spennt eftir afmælispakka þar sem ég treysti á að fólk (lesist Sandra Sif Einarsdóttir) sendi mér einn svona í tilefni dagsins.

Veisluþjónusta Guggu?

2010-03-22T08:39:00.007Z

Vil biðja fólk um að minna mig á að ég tek EKKI að mér að elda fyrir 50 manna ráðstefnur eða annað slíkt.

ASK eða Arkeologisk Student Konferans var haldin nú í fyrsta skipti í Stokkhólmi um helgina. Hugmyndina um að safna saman fornleifafræðinemum frá gjörvallri Svíþjóð, halda fyrirlestra og kynnast hvort öðru, fengum við Inga, Cissi og Elin fyrir um ári síðan og nú er þetta orðið að veruleika. Ráðstefnan heppnaðist frábærlega og voru stúdentar frá Stokkhólmi, Lundi, Gautaborg og Uppsala jafn ánægðir og við með framkvæmdina enda voru bæði Gautaborgarar og Lundarar jafn æstir í að halda ráðstefnuna að ári að það þurfti að skera úr um hvor hreppti hnossið með sérstökum úrdrætti sem hér eftir mun heita Íslenska Lottóið.

STARK bauð upp á mat og gistingu fyrir alla og var sett met í áti um helgina, held ég bara, því eins og sönnum Svía sæmir þarf að fika á klukkutíma fresti og svo var náttúrulega þessi dýrindis kvöldmatur (þó ég segi sjálf frá) með kladdköku al a Inga í eftirrétt.

Eftir kvöldmat var svo minglað aðeins með drykk í hönd þar sem þema kvöldsins var rauðir skór, þó enginn virtist vita af því nema ég og Inga.

Fengum m.a. ofur góða gesti frá Lundi!

Systir mín svo sæt og fín...

2010-03-14T20:13:00.005Z

á afmæli í dag og er bara orðin þrjátíu og bleeh ára stelpan, sem mér finnst reyndar mjög undarlegt þar sem hún er 3 árum eldri en ég og ekki er ég komin yfir þrítugt, er það!

Til hamingju með daginn þinn Birna mín og njóttu vel afmælisdagsins og þá ekki síður afmælisgjafarinnar frá okkur mafíumeðlimunum!

P.s. myndin er ekki nýleg.

Känn ingen sorg för mig Göteborg!

2010-03-14T19:37:00.008Z

Ég og Inga Hlín afmælisstelpa fórum og heimsóttum Söndru í Göteborg um helgina.

Höfðum það svaka gott og ráfuðum aðeins um en vorum aðallega bara að borða, t.d. þennan bruncsh með heimabökuðum skonsum a la Sandra og ýmsu öðru gúmmelaði.

Svo gerðum við líka sushi

og mikið af því!

Svindluðum okkur svo oft í strætóinn hennar Söndru

og í sporvagnana!

Svalt starfsheiti óskast!

2010-03-08T21:10:00.008Z

Er búin að vera að dunda mér upp á síðkastið að föndra nýja ferilskrá. Ekki að það væri neitt að þeirri gömlu en ég bara fann hana ekki, sennilega vegna þess að hún var líklega í gömlu tölvunni minni sem dó drottni sínum í fyrra. Því hef ég verið að reyna að rifja upp hvar og hvenær ég hef unnið um ævina og reyna að hnoða því saman á ekki mjög ruglingslegan hátt sem er frekar erfitt þar sem ég hef greinilega sjaldan verið í færri en tveimur vinnum á sama tíma og jafnvel skóla líka.
En við þessa samantekt yfir líf mitt komst ég að því að ég hef engan veginn haft nógu svöl starfsheiti. Er þá ekki bara spurning um að dikta upp einhver svalari starfsheiti?

Hæ, ég heiti Gugga og er krókódílatemjari.

Sæl, Gugga heiti ég, ljónahirðir.

Blessuð, ég heiti Gugga og starfa við að baða flóðhesta.

Sæll, Gugga hér, ofurhugi með meiru.

Skikkjan er klárlega málið!

Kemur aldrei aftur vor?

2010-02-23T11:22:00.006Z

Svíar og aðrir sveitungar eru mjög uppteknir þessa dagana af vorinu eða réttara sagt vorinu sem aldrei kemur, sænska veðurstofan segir nebblega að vorið sé ekkert á næsta leiti!
Ég vil bara benda fólki á að það er 23.febrúar!!!!

En sænsk dagblöð hræða lesendur sína á meðan með myndum eins og þessari.

Þó mér sé ekki vel við svona mikinn kulda,

þá finnst mér þetta frekar kosý.

Svo get ég líka skemmt mér á skautum á meðan...

Það eru maurar í teppinu...skrýtin lítil skrímsli....

2010-02-19T04:45:00.004Z

Er í nettu nostalgíukasti eftir kvikmyndakvöld á Debaser Medis í gær þar sem við Inga og Auður horfðum á nýútkomna heimildamynd um BLUR! Myndin fannst mér góð og vel gerð og þeir eru allir orðnir vinir aftur...ótrúlega krúttlegt.
uhh...geta fertugir lifaðir popparar verið krúttlegir?

En við að rifja upp Blur árin mundi ég einnig eftir þessum dásamlega dúett Damon og Francoise Hardy sem er á smáskífunni Country House.

Upp er runninn Öskudagur...

2010-02-17T15:52:00.007Z

og ég sem er einstaklega mikil áhugakona um að klæðast grímubúningum var að spá í að vera Bleiki Pardusinn í dag en svo fattaði ég að ég átti ekki Bleikan Pardus búning svo það datt eiginlega um sjálft sig! En var samt að spá í staðinn að hengja öskupoka aftan á fólk en datt svo í hug að það er kannski ekki þekktur siður hér í Svíaríki þannig myndi ég áræðinlega verða talin eltihrellir svo ég ákvað að salta það aðeins.
En verð ég búsett á öskupokavænni stað að ári verður þetta klárlega málið!

Hinsvegar gerði ég dauðaleit að ketti og tunnu til að skella honum í en hef ekki fundið enn. Þannig að ég er að spá í að láta mér nægja að hitta Ingu og Auði á Gulu Villunni og fá mér súpu og kannski eitthvað meir...

Hvenær ætli kettinum í tunnunni hafi annars verið skipt út fyrir sælgætið? Persónulega finnst mér meiri akkur í að fá nammi úr tunnunni heldur en kött.

Ég ætti kannski bara að prófa að lemja Ingu og Auði og sjá hvort þær gefi mér nammi?

Það er Bolludagur í dag...

2010-02-15T10:37:00.006Z

og ég er ekki búin að borða bollu í dag sökum þynnkuseinkunar! Borðaði þó nokkrar í gær svo ég er kannski stikkfrí í dag en svo kemur kannski andinn yfir mig seinna í dag, eða þynnkan lætur sig hverfa, og þá á ég enn nokkrar til góða.

Um helgina kom Sandran í heimsókn í höfuðstaðinn

og við borðuðum á Blåber sem er með skrilljón tegundir af geðveikt góðum salötum á stúdentavænu verði, tókum einnig smá lúr í bíó meðan Inga horfði á Sherlock Holmes, fórum á skauta í Kungsträgården, bökuðum bollur, borðuðum bollur, fengum okkur að borða á Helens sushi, fórum svo í afmæliskökuboðspartý til Tinnu

og enduðum í trylltu tjúttpartý hjá Hófí og Theo

þar sem Inga snerist í hringi

en Auður var eitthvað efins

Þvottavélaþrjótar!

2010-02-11T08:57:00.004Z

Þvottahúsið mitt hér á Lappis er óendanleg uppspretta pirrings og almmenna leiðinda. Fyrir utan að halda þvottinum mínum í gíslingu endrum og eins þá er það einnig fólkið sem gengur þar um sem á sök á hluta pirringsins. Bókunarkerfið í þvottahúsinu er nú ekki mjög flókið. Maður getur bókað 1 þvottatíma á dag og þá fær maður 2 vélar í 1,5 klst. og maður velur getur valið hvaða 2 vélar maður vill fá, að því gefnu að þær séu ekki þegar bókaðar, og svo er alltaf 1 vél sem er svona „á síðustu stundu“ vél. Allt er þetta skilmerkilega merkt og útskýrt á sænsku en þar sem meirihluti þess fólks sem býr hér á Lappis eru skiptinemar frá Suður-Evrópu og Asíu skilja þau ekki sænsku leiðbeiningarnar! Lendi ég þar af leiðandi í atviki eins og nú í morgun þar sem ég kom að stúlku sem var búin að dreifa þvottinum sínum í báðar vélarnar mínar og eina til en ekki í vélina sem hún átti sjálf bókaða!

Hvað helduru?

2010-02-09T17:44:00.002Z

Þegar ég var 18 og leit út fyrir að vera 14 passaði ég mig á því að svara aldrei spurningunni „Hvað ertu gömul?“ með „Hvað helduru?“ því svarið var e-ð sem ég vildi ekki heyra á þeim tíma. Í dag er ég hins vegar 33 ára óþolandi týpan sem gerir þetta ítrekað, allavega á meðan ég er enn spurð um skilríki í Ríkinu (bæði íslenska og sænska), boðið að kaupa ungmennafarmiða í strætó og get svindlað mér inn á flugeldasýningar frítt undir 12 ára!

Kjánahrollur ársins 2010?

2010-02-08T19:38:00.003Z

Er vart búin að ná mér af kjánahrollinum sem fylgdi því að horfa á Melodifestivalen á laugarsdagskvöldið. Kynnarnir eru svona týpískt tríó, ein kona og tveir karlar, sem samanstendur af þremur misfrægum Svíum og eru bara alls ekki fyndin þrátt fyrir ítrekaðar tilraunir. Hinsvegar fannst mér þetta söng- og dansatriði Dolph Lundgren aka Ivan Drago(sem er einn af misfrægu Svíunum) bráðfyndið, þó svo að mig gruni að það hafi ekki verið ætlunin.

Fyrir þá sem ekki vita hver Ivan Drago/Dolph Lundgren er (Inga Hlín), set ég inn atriði með einni fleygustu setningu kvikmyndasögunnar.

Ein ég sit og sauma...út í gömlum krosssaumi.

2010-02-05T17:08:00.004Z

Fékk nefnilega Öræfarósina mína í dag og var svo spennt að byrja að allar áætlanir um IKEA- og matvöruverslunarferð fuku út um veður og vind.
Einhvern tíma í fyrndinni saumaði ég út í púðaver með forljótri mynd og ennþá ljótari litum því handavinnukennaranum fannst óþarfi að ýta undir sjálfstæða hugsun eða ákvarðanir hjá 11 ára nemendum sínum. Myndin var prentuð á strammann í lit svo þetta vafðist ekki mikið fyrir manni þó svo að púðaverið megi kannski enn finna hálklárað inn í skáp hjá mömmu. Það var þó ekki skortur á hæfileikum sem átti sökina heldur einfaldlega þrjóska, mótþrói og almenn uppsteit.
Í þetta skiptið er hins vegar engin mynd prentuð á strammann (maður verður s.s. að telja út sjálfur) en þrátt fyrir smá „hardcore“ útsaum hef ég fulla trú á sjálfri mér enda hef ég minna verið með uppsteit svona í seinni tíð. Svo er Öræfarósin einfaldlega of fín til að maður klári hana ekki!

Á skautum mun ég skemmta mér, skemmta mér...

2010-01-31T15:21:00.002Z

Er nú orðin hamingjusamur eigandi nýrra skauta!
Fór s.s. í Stadium í gær og keypti mér þessa líka ofsa fínu skauta sem eru loðnir að innan og svo girnilegir að mér langar helst til að vera bara tásuber í þeim. Stadium fær hinsvegar toppeinkunn fyrir arfalélega þjónustu í öllum þremur búðunum þeirra sem ég fór í!
En nú bíð ég bara eftir að frostið fara undir -10°C svo ég verði ekki úti við að prufa nýju skautana mína.

All my colours...

2010-01-28T19:41:00.003Z

Karrýgult er sem sagt einn af nýju uppáhaldslitunum mínum, keypti mér einmitt þessa dásamlegu peysu frá Rules by Mary núna á lokaútsölu, en hana er ég er búin að þrá í allt haust, og viti menn...það eru karrýgul blóm á henni!

Undirbúningur fyrir ÓL 2026 er hafinn!

2010-01-19T16:49:00.005Z

jú jú, þá er undirbúningur minn fyrir Vetrarólympíu- leikana árið 2026 hafinn en þar hef ég hugsað mér að keppa í listhlaupi á skautum! Er búin að spá mikið en hef ekki enn ákveðið hvort ég muni keppa í einstaklings- eða paraflokki. Æfingar eru að vísu ekki hafnar en búningurinn er næstum komin á hreint, er eins og stendur með valkvíða milli þessara tveggja.

Kannski fær ég fleiri hugmyndir frá EM á skautum sem haldin er í dag og næstu daganna í Tallinn. Ef það eru engir fínir búiningar þar, þá er alltaf hægt að halda í vonina þar sem Vetrarólympíu-leikarnir eru nú í febrúar!

heimsins heppnasti sauður

2010-01-10T16:40:00.002Z

hélt að ég hefði toppað Tapað/Fundið skorið hér en annað kom á daginn þegar ég gleymdi tölvutöskunni minni á brautarpallinum hjá Arlanda Expresslestinni út á flugvelli þegar ég kom til Sthlm í hádeginu í dag! Í töskunni var að sjálfsögðu tölvan mín með ritgerðinni og fyrirlestrinum sem ég var að vinna að heima öll jólin og á að flytja á þriðjudaginn, fyrir utan svona allt annað sem einhverju máli skiptir varðandi mitt meistaranám hér í Svíaríki. Ég var með heilan einhverstaðar í bandi á eftir mér svo ég fattaði ekki að ég væri ekki með téða tösku fyrr en heim var komið og búið að taka upp úr þeim töskum sem ég mundi eftir! Panikaði náttúrulega og hringdi í Ingu (en hún er svo heppin að fá alltaf að taka þátt í svona veseni með mér) og fundum upplýsingar um Hittegods (Tapað/Fundið þeirra Svía)bæði hjá Arlanda Expresslestinni og flugvellinum sjálfum. Fékk bara upplýsingar um tölvupóst og símsvara, sendi tölvupóstinn en þar sem ég les ekki inn á símasvara þá sleppti ég honum en ákvað svo einnig að fara niður á Centralstation og tékka hvort eitthvað hafi fundist. Og viti menn, tölvutaskan mín fannst nokkrum mínútum eftir að ég tók lestina svo ég er komin með hana og allt sem í henni var í mínar hendur.

Er nú orðin kunnug öllum hnútum varðandi Hittegods hjá hinum ýmsu stofnunum og fyrirtækjum hér svo ef þið týnið einhverju hér í Sverige hafið bara samband og ég get leiðbeint ykkur í gegnum ferlið.

mig dreymdi að væri komið árið 2012

2010-01-01T12:21:00.014Z

en 2010 er það nú víst. Verð líklega um mánuð að venjast nýju ártali eins og venjulega...ekki sérlega gott þegar maður byrjar að leita uppi glósurnar fyrir próf og undrar sig á því af hverju það eru árs gamlar glósur innan um nýjar!

Fjölmiðlarnir eru alltaf uppfullir á nýju ári af yfirliti í máli og myndum yfir það gamla og ákvað ég í ár að vera enginn eftirbátur þeirra og skella hér inn mínu ári í máli og myndum - aðallega myndum þó.

Janúar - forvarði gripina frá Birka.

Febrúar - fór á skauta.

Mars - leiddist stundum.

Apríl - mátaði fornleifar í Hallandi.

Maí - tók fullt af sýnum.

Júní - gekk ég með sólgleraugu.

Júlí - mokaði holur meðan Busi svaf.

Ágúst - þeysti um á bát á Þjórsá.

September - gróf mína fyrstu gröf.

Október - polkagrisar og nammigrísar.

Nóvember - var andvaka milli matarboða.

Desember - jól og fimbulkuldi á Íslandi.

Áramótaheitið í ár verður hinsvegar leyndó...aðallega svo ekki sé hægt að benda mér á að ári að ég hafi ekki haldið það heit.

jólin koma, jólin fara...

2009-12-26T18:30:00.004Z

húfur og polkagrisar eru aðalmálið þessi jól!

í dag, annan í jólum, þjáist maður svo af of stórum skammti af súrefni eftir skauta- og ísbátsferð á Rauðavatni.

einu sinni var...

2009-11-17T17:24:00.003Z

Geirfuglinn ungur og fagur...en það var áður en hann byrjaði að marinerast undir flúrperum í hripleku húsnæði Náttúrugripasafns Íslands.

(Myndin er í boði Ljósmyndasafns Reykjavíkur)

andvökunætur!

2009-11-10T16:24:00.003Z

hvernig stendur á því að einu næturnar sem maður liggur andvaka og getur ekki með nokkru móti sofnað eru þegar maður þarf að vakna snemma morguninn eftir! Af hverju eru andvökunætur ekki teknar frá fyrir föstudaga og laugardaga þ.e.a.s ef maður þarf ekki að mæta t.d. í vinnu þessa daga. Ég er núna með tímasókn á þriðjudags- og fimmtudagsmorgnum svo það er ekkert mál fyrir mig að vera andvaka á sunnudögum eða miðvikudögum en neiii.
Í nótt var ég t.d. andvaka og sofnaði ekki fyrr en um kl.5 í morgun. Var þá orðin svolítið stressuð að ég myndi ekki vakna á réttum tíma (um kl.8) til að mæta í tíma og stillti því símann minn (sem einnig þjónar tilgangi vekjaraklukku) á 2 mismunandi tíma svo ég myndi nú örugglega ekki sofa yfir mig. Vaknaði svo eldhress...í hádeginu og sá að síminn minn var í pörtum á gólfinu (gerir það yfirleitt þegar ég missi hann í gólfið) sem útskýrir sennilega af hverju ég vaknaði ekki við vekjarann. Eina sem hægt var að gera í stöðunni, þar sem ég var búin að sofa af mér tímann sem ég átti að mæta í, var að reyna að pússla símanum mínum saman og fá hann til að virka. Eftir að hafa sett hann í hleðslu, klappað honum og hvíslað að honum tók hann loks við sér og virkar ...ehhm ætlaði að segja fínt en eins og áður á betur við hér.
Er núna farin að hugsa meira um að kaupa mér nýjan síma (sem dettur ekki alltaf í sundur þegar ég missi hann í gólfið) eða kannski ætti ég bara að kaupa mér vekjaraklukku?

mamma, pabbi og strumpur.

2009-11-05T19:02:00.007Z

að sjálfsögðu hefur verið heilmikið um að vera hjá mér síðan síðast. Vöntun á bloggi síðasta mánuðinn eða svo skrifast eingöngu á almenna leti. Mamma mín og pabbi komu í heimsókn 22. okt. og voru í tæpa viku. Skoðuðum borgina, fórum á Vasamuseet en ég gleymdi myndavélinni aftur (í 3ja skiptið sem ég fer þangað) þannig að ég get ekki sýnt ykkur myndir af því, sver samt að ég hef komið þangað. Borðuðum líka heil ósköp (ég er s.s. nýfarin að þurfa að borða aftur) og versluðum lítillega en rúntuðum aðallega í almenningssamgöngum borgarinnar s.s strætó, neðanjarðarlestum, ferju og sporvagni. Held að hann faðir minn hafi farið oftar í strætó á þessum 5 dögum heldur en alla sína ævi! En nú eru þau sem sagt farin heim og ég er aftur orðin fátæk og svöng.

mamma mín og pabbi minn í ferjunni á leið út í Djurgården.

tókum svo sporvagninn tilbaka.

Um síðustu helgi ákvað ég hinsvegar að vera strumpur bara svona í tilefni að því að það var laugardagur og þið sem þekkið mig vel vitið hvað mér finnst gaman að grímubúningum!

Þema kvöldsins var Kvartandi Nágrannar og tókst svona líka ljómandi. Eina partýið sem ekki var slegið af vegna velheppnaðs þema var þetta:

það var svona gaman í fornleifaflandrinu í síðustu viku

2009-10-21T18:02:00.002Z

forn, forn, fornleifaferð.

2009-10-11T19:16:00.003Z

þá er komið að fornleifaskoðunarferðaflandrinu þessa önnina (er búin að þróa soldið nýyrðasmíðina, s.s komin meira út í lööööng samsett orð núna). Nú er ferðinni heitið til Västra Östergötland och Visingsö sem gæti útlagst á íslensku sem vestra austurgautaland (Svíarnir eru greinilega ekkert of klárir með þetta austur/vestur dæmi)og Visingseyja. En þar er ekki þverfótað fyrir fornleifum, frekar en annars staðar í Svíþjóð, og konungaættir Gauta (Folkungar og Sverkir) á miðöldum drápu hvern annann hægri vinstri fyrir yfirráðin á svæðinu svo það hlýtur að vera eitthvað varið í þetta. Við munum gista á farfuglaheimili í Vadstena sem mér er sagt að sé mjög fallegur bær og fyrir þá sem það ekki vita þá er Vadstena einmitt vinabær Patreksfjarðar (eða svo segir Wikipedia allavega).

Um helgina var Sandra hinsvegar í heimsókn og við fórum m.a. á frábæra tónleika með Nouvelle Vague. Þeir fóru alveg fram úr öllum vonum og við skemmtum okkur mjög vel. Í gærkveldi fórum við svo á rosalega góðan og billigan Tapasbar á Kungsholmen og höfðum svo „myskväll“ heima með stinky ostum o.fl. góðgæti.

These are a few of my favorite things

2009-10-05T22:06:00.006Z

steinöld, já takk!

2009-09-21T16:44:00.008Z

jæja þá er kannski komið að því að segja ykkur aðeins frá uppgreftinum. Ég er s.s. að grafa á stað sem heitir Korsnäs og er úti í rassgati eða rétt fyrir sunnan Tumba sem er svo aftur rétt fyrir sunnan Stokkhólm. Korsnäs er um 5000 ára gamalt steinaldar búsetusvæði með PWC menningu. Þar er líka Hare Krishna trúboðsmiðstöð en hún er samt bara 40 ára. Erum búnar að vera í 3 vikur að grafa þar og ættum að klára á morgun en það gæti breyst þar sem við fundum GRÖF í dag. Well, allavega hauskúpu og hún var náttlega úti í horni á svæðinu okkar svo við stækkuðum það um 1x1 í dag til að sjá hvort einhver beinagrind fylgir þessari hauskúpu. Náðum samt ekki að klára að grafa niður á það í dag svo enn er óvíst hvort þarna sé bara hauskúpa eða ekki. Því er soldið óvíst hvenær við náum að klára að grafa en sennilega í þessari viku, ég nenni barasta ekki að vakna kl.6 fram í október! En fyrir utan svona óeðlilegan fótaferðatíma (fyrir þá sem hafa ekki áttað sig á því enn er ég ekki morgunmanneskja!) þá er uppgröfturinn og steinöld geðveikt skemmtileg. Við erum með massor af gripum eða um 20kg af keramiki og nokkuð af fínum smágerðum gripum eins og míní keramikkrukku og míní örvarodd.

svæðið okkar er hvorki stórt(4x4m) né djúpt(50cm) en við erum með rúm 900 fundarnúmer!

pokar með keramiki en 1 svona poki kemur úr 50x50cm reit!

þennan hringlaga niðurgröft komum við niður á á fimmtudaginn og þar fann ég tvær mennskar tennur svo við héldum að þarna væri kannski gröf.

en sennilegast er hún hér við hliðina á.

nýtt útlit

2009-09-13T21:25:00.004Z

loksins, loksins

2009-09-12T16:30:00.010Z

er ég komin með einhver húsgögn inn í herbergið mitt og nú er það geðveikt fínt. Keypti mér 2 borð og hægindastól Myrorna (Hjálpræðishernum) í dag og nú vantar bara náttborð..og kannski eitthvað á veggina. Er orðin "kändis" í Myrorna líka og var heilsað eins og gömlum vin þegar ég kom þangað í dag enda voru báðir mennirnir sem afgreiddu mig síðast (þegar ég mætti 5 mín. fyrir lokun) og sendibílstjórinn sem kom með dótið mitt á staðnum.

hurðin inn til mín, fatahengið og fataskáparnir

fíni tekkskápurinn minn

borðið er stækkanlegt og mér finnst stólarnir dásamlegir

hægindastóllinn og sófinn minn

nærmynd af litla, sæta sófanum mínum

að sjálfsögðu er appelsínugult þema á baðherbeginu

þar er líka vaskur og speglaskápur

þetta er allt að koma

2009-08-31T17:38:00.002Z

málararnir komu í morgun og nú er herbergið mitt orðið voða hvítt og fínt. Þannig að nú get ég farið að spá í að versla húsgögn sem mig vantar. Er búin að fara svona æfingaferðir í Myrorna (Hjálpræðisherinn) og búin að sjá hitt og þetta sem mig langar í á skid og engen, er nú bara að bíða eftir að fá peninga frá Íslandi sem og nýtt bankakort til að geta keypt etwas.
Á morgun byrja ég hinsvegar að grafa í Korsnäs í Södermannland sem er rétt fyrir sunnan Stokkhólm. Þetta er búsetusvæði frá steinöld og möguleiki á að finna grafir. Ég er mjög spennt því ég haf aldrei grafið í steinöld né í grafreiti. En ég þarf hinsvegar að vakna óþægilega snemmma eða um kl.6:00 sem mér finnst ekki gaman. Býst við að maður verði þá bara eins og ekta Svíi allan september mánuð, vakna klukkan sex og að sofa klukkan tíu. Nei fjandinn, þá var ég líka svona sænsk í sumar!

hæ hó og jibbbí jei og jibbí jei....

2009-08-29T10:08:00.004Z

ég er búin að fá veskuna mína aftur! Einhver góðhjartaður Svíi hefur tekið alla peningana úr veskinu mínu en skilið allt annað eftir! Ég gat því farið í Tapað/Fundið hjá SL í gær og náð í hana. Var svo heppin að smápeningarnir voru enn til staðar svo ég gat skrapað saman 40sek til að leysa hana út. Mér þótti verst við þetta allt saman að tapa veskinu sjálfu því er ég mjög hamingjusöm að hafa fengið það aftur.
En að öðru og ekki síður skemmtilegu þá fórum við Inga með Lenu, leiðbeinandanum okkar, til Birka á fimmtudaginn. Fengum ofsa gott veður og gengum um eyjuna þar sem Lena sagði okkur frá fyrri uppgröftum og sýndi okkur helstu uppgraftarstaðinu sem hún hefur m.a. grafið á. Sá húsið mitt og fékk betri tilfinningu fyrir staðnum en Birka er mjög falleg eyja og siglingin þangað um Mälaren ekki síðri.

Ég og Inga erum að spá í að fá okkur sitthvort húsið þarna. Ekki amalegt að búa rétt fyrir utan Stokkhólm og rúnta á bát í vinnuna!

sauður í Svíþjóð!

2009-08-26T12:06:00.002Z

Jæja, nú held að ég hafi alveg toppað persónulega skorið í Tapað/EKKi Fundið. Týndi veskinu mínu í Tunnelbananum seint í gærkveldi. Þar hafði ég troðið öllu því sem varið er í og nauðsýnlegt er til að komast af í skilríkjaríkinu Svíþjóð, passanum, kreditkortum, bankakortum, dagbókinni og húslyklunum! Fattaði þetta ekki fyrr ég var komin upp í háskóla en þar var mjög almennilegur starfmaður á T-bana stöðinni sem lét tékka í vögnunum á endastöðunum en ekkert fannst. Ég gaf því skýrslu hjá lögreglunni og tékkaði á lásasmið því ég komst náttlega ekki inn til mín lyklalaus en það kostaði heilar 1.600sek svo ég ákvað bara að eyða nóttinni á gólfinu hjá Ingu en hún var svo heppin að vera með mér og fá að taka þátt í þessu ferli. Inga var sem betur fer ekki búin að henda ógjó dýnunni sem var skilin eftir í herberginu hennar svo ég svaf nú ekki á beru gólfinu (þó það geri söguna aðeins skemmtilegri). Svaf því inní sængurverinu mínu (sem ég hafði verið að sækja ásamt öðru dóti til Rannveigar í Farsta) svo ég kæmi ekki við ógjó dýnuna því ekkert var lakið.
Í morgun fór ég svo á skrifstofu húsvarðanna til að fá nýja lykla svo ég kæmist inn til mín. Þeir voru mjög hamingjusamir yfir að fá að skipta um lás hjá mér og nú held ég bara að allir húsverðirnir viti hver íslenska stelpan með allt vesenið er!
Ekki amalegt að vera orðin "kändis" hjá SSSB

Ryksugan á fullu, étur alla drullu, tralalala...

2009-08-25T13:20:00.000Z

jáhá, þá er maður komin aftur til Stokkhólms og flutt inn á stúdentagarðana. Fékk smá áfall þegar ég kom inn í herbergið mitt en það var virkilega skítugt og svo voru naglar og skrúfur út úr öllum veggjum. Hafði t.d. ekki lyst á að fara í sturtu á skítugu baðinu. Þar fyrir utan var skilið eftir einbreitt rúm án dýnu sem ég hef ekkert að gera við þar sem herbergið á að vera án húsgagna og ég búin að ákveða að kaupa mér rúm í IKEA. Ég ákvað því að fara í morgun og tala við húsvörðin og láta fjarlægja rúmið en einnig kvarta yfir þrifunum og skrúfum og nöglum í veggjunum. Rúmið var fjarlægt með það sama og svo var mér boðið uppá að fá keypt þrif eða þrífa sjálf og fá borgað fyrir það! Nú er ég sem sagt á launum við að þrífa hjá mér ;)
Húsverðinum fannst greinilega einnig nóg um öll götin á veggjunum eftir nagla og skrúfur (fyrir utan það sem er enn í veggjunum) að hann pantaði málara til að mála herbergið mitt svo það verði nú fínt.

seinna meir...

2009-07-06T19:17:00.002Z

mun ég væntanlega fara að blogga meir en ég hef gert síðastliðinn mánuð. Er búin að vera að grafa á Hólmi í Nesjum og í Öræfasveitinni síðan ég kom heim í byrjun júní. Netsamband er því af skornum skammti og líður bloggið mitt fyrir það (alls ekki bloggleti höfundar!). Eigum nú rúma viku eftir hér á Höfn og spurning hvort fátæki stúdentinn (það er s.s. ég) geri aðra tilraun til að fá sér Humarsúpu á Humarhöfninni. Kannski að ég ætti að rukka inn máltíðina sem mér var lofað í fyrra (sjá hér).

Ég hef engu gleymt þó að ég tali ekki um það

2009-06-03T18:46:00.004Z

Ja hérna hér, er maður þá bara ekki að flytja búferlum tímabundið á morgun þegar ég kveð minn yndislega Stokkhólm og heilsa mínu ástkæra Ísalandi. Það er allt á milljón við að klára síðustu verkefnin og pökkun er troðið svona inn á milli.

Feltkúrsin kláraðist í síðustu viku og þá tóku við lokagreiningar á sýnum og skýrsluskrif ásamt kynningu á rannsókninni. Þá að sólin hafi leikið við mannskapinn, nema okkur sem vorum inn í helv...skóginum, þá var að sjálfsögðu rigning síðasta daginn (Kirkjubæjarklaustur sælla minninga!) en ég og Inga fórum þá bara inn að greina sýni ;)

en sólin sýndi sig nú nokkra aðra daga.

Það er nú svo. Verð komin heim í eftirmiðdaginn á morgun og hlakka til að knúsa púkana á neðri hæðinni í Fannafoldinni!

venjulegur föstudagur

2009-05-30T08:25:00.007Z

í fornleifafræðinni hér í sólríka svíaríki endar á grilli og busli í Mälerenvatni. Fornleifafræðideildin stendur við skóg og vatn og þar sem það er alltaf sól í Stokkhólmi og gott veður þá förum við niður að vatni eftir skóla, grillum, syndum í vatninu og sólum okkur. Að sjálfsögðu fylgir þessum sið áfengir drykkir.

Byrja á því að busla aðeins áður en maður stingur sér til sunds :)

Inga buslaði líka áður en hún lagðist til sunds :)

Svo sóluðum við okkur eftir á.

P.s. því miður var filman búin í myndavéinni svo ég get ekki sýnt myndir af sundtökum í vatninu.

Ein voða dofin

2009-05-25T18:54:00.002Z

já, ég er greinilega ekkert smá dofin. Þegar ég kom úr Tunnelnum í Farsta rétt um kl.17 í dag byrjaði eitthvað fólk og börn að skrækja og svo kom einhver gaur í svörtum æfingagalla, með eitthvað drasl á hausnum sem náði fyrir andlitið á honum, og hljóp á harðaspretti með poka í hendinni framhjá mér. Á eftir honum hljóp annar gaur með myndavél og virtist vera að taka upp á video á hlaupunum. Ég hélt að þetta væru einhverjir gaurar að taka upp stuttmynd eða eitthvað álíka og var einmitt að spá hvort ég hefði á að vera svolítið kvikindisleg og fella gaurinn með draslið á hausnum og pokann! Ég færði mig nefnilega aðeins til hliðar svo hann hlypi ekki á mig.
Núna var ég hinsvegar að lesa fréttir inn á Dagens Nyheter og þá sá ég þessa frétt!
Það var s.s. ekki verið að taka upp neina stuttmynd heldur var gaurinn með pokann ræningi vopnaður byssu sem hann hleypti af inni hjá gullsmiðnum!

Var ég þá s.s. að aðstoða hann við að komast undan með því að færa mig frá?

Er ég kannski meðsek?

klemmudagur!

2009-05-22T17:04:00.002Z

Svíar hafa þennan magnaða sið að ef það er frídagur á fimmtudegi eins og í gær á Uppstillingardegi, eins og Inga segir, þá er föstudagur s.s klemmudagur og hann er þá bara frídagur líka til að ná laaangri helgi út úr þessu öllu saman. Verslanir og veitingastaðir eru þó opnir. Eeen þar sem ég er EKKI að vinna í búð eða á búllu þá er ég í fríi í dag! Þarf reyndar að læra en það er allt önnur Ella.

ljótukjólavision - úrslit

2009-05-17T12:48:00.006Z

því miður fóru úrslit Júróvision söngkeppninnar ekki á sama veg og mín úrslit í ljótukjólavision sem ég verð eiginlega að breyta í ljótuklæðavision vegna Ameríska keppandans (sem keppti fyrir Þýskaland því USA er ekki enn komið í keppnina) því hann flaug inn á Topp 5 í þessum klæðum!

Eins og sannaðist með ameríska þjóðverjanum þá er nauðsynlegt að koma með nýtt blóð í aðalkeppnina því eitthvað verður mitt illkvittna hjarta að hafa til að gleðjast yfir á lokakvöldinu. Skemmti mér einmitt konunglega yfir hinni spænsku Sorayu og kjólnum hennar.

Hönnuðirnir hafa greinilega ruglast á Eurovision Song Contest og European Figure Skating Championships!

Albanska atriðið úr dótabúðinni olli mér dálitlum ugg.

Græni gæinn er bara krípi (svo maður sletti á góðri íslensku) og stúlkan hefur ákveðið að fylgja þemanu með snípsíðum kjól en ólíkt öðrum keppendum (lesist Rúmenía og Úkraína) var hún stjörf af ótta við að það sæist hvort hún færi í Brazilískt eða ekki!

Uppáhaldið mitt og í mínum huga sigurvegari keppninnar er samt enn Svetlana frá Úkraínu.

Hlakkaði mikið til að sjá í hverju stúlkan sú myndi klæðast að ári.

Vildi óska þess að Júróvision væri svona 3 sinnum á ári því betri skemmtun yfir ljótum klæðnaði er vart hægt að hugsa sér. Þarf ég virkilega að bíða í ár eftir að geta tekið gleði mína á ný?

ljótukjólavision - taka tvö

2009-05-14T20:37:00.008Z

beið spennt eftir að keppnin byrjaði í kvöld til að geta skemmt mér yfir dásamlegri hugmyndaauðgi keppenda í ljótufatavali. Varð snarlega fyrir vonbrigðum þrátt fyrir góða tilraun hjá Írlandi með þetta 80´s glamúrrokkoutfitt.

Um miðbik keppninnar tók ég hinsvegar gleði mína á ný þegar ungverska liðið, sem villtist á leið á Las Vegas sjóvið sem þau áttu að sýna í árið 1989, mættu á sviðið.

Setti inn svona bónusmynd til að hægt sé að dást betur að ljótleikanum.

Eftir þetta batnaði keppnin til muna enda kom Aserbadsjan strax í kjölfarið með þetta innslag.

Snípsíðir kjólar með slóða. Ég var farin að sakna þeirra.

Þegar Svetlana frá Úkraínu mætti svo í þessari múnderingu þá tók mitt litla illkvittna hjarta nokkra gleðikippi því hér mun drottningin sjálf vera mætt á svæðið.

P.s Lady Gaga vill fá stígvélin sín tilbaka!

sannanir!

2009-05-14T17:23:00.011Z

ef einhver skyldi hafa efast um réttmæti þess að tala um Júróvision sem ljótukjólakeppni þá eru sannanirnar yfirgnæfandi.

Ég hélt að Malene frá Svíþjóð væri í ljótasta kjólnum með eitthvað fjaðradrasl hangandi neðan úr honum.

En það var áður en ég sá kjólinn hennar Jóhönnu! Það er þó allavega hægt að skilgreina það sem hangir neðan úr kjólnum hennar Malene, þetta eru hinsvegar bláar..borðtuskur?

Tyrkland sló alveg í gegn með þessum...magadansbúningadressum?

Held samt að Alladínbuxurnar með klaufinni og ökklastígvélasandölunum? hafi alveg sett punktinn yfir ljótleikann.

Ísrael stóð sig einnig með prýði í ljótufatavali, enda veit maður varla hvað á að kalla þetta sem söngkonan vinstra megin er í.

Hef grun um að henni hafi fundist kjólinn of stuttur (náði ekki niður fyrir rass) svo slóðanum var skellt aftan á. Eitthvað hefur henni fundist kjóllinn enn sýna of mikið að neðan svo það var ákveðið að splæsa buxum og hnéháum stígvélum við! Held líka að hönnuðurinn sé blindur.

Myndin af búlgörsku aukaleikurunum í endurgerð myndarinnar Willow segir allt sem segja þarf!

Greinilegt að Elena hin rúmenska fer í Brazilískt! Veit ekki hvað slóðinn á að fela, enda tekst honum ekkert sérlega vel upp. Strápilsafílingurinn hjá dönsurunum er samt alveg til að toppa ljótleikann hér.

Finnsku stelpurnar stóðu sig líka nokkuð vel í kjólum úr versluninni Mótor frá árinu 1995.

ljótukjólavision

2009-05-12T20:32:00.003Z

lögin voru leiðinleg svo ég ætla bara að tala um eitthvað allt annað t.d. alla ljótu kjólana. Það er greinilegt að þema júróvísionkeppninnar í ár eru ljótir kjólar, snípsíðir og helst með slóða eða einhverskonar magadansbúningakjólar! Er hrædd um að Jóhanna nái ekki að vinna þetta því bæði Ísrael og Rúmenía standa henni langtum fremri.
Er samt varla að trúa því að kjólinn hennar sé frá Anderson & Lauth sem hanna mjööög flott föt, annað hvort hafa Gunni og Kolla dottið á höfuðið eða kannski hafa þau þurft að laga hönnunina að smekknum hennar Jóhönnu?
Kynnarnir eru svo annað mál, fékk alveg kjánahroll niður í tær við brandarana þeirra þegar gæinn með hárkolluna og standpínuna fyrir fyrirsætunni var alveg nógu kjánalegur án brandarana!
En það verður spennandi að sjá hvort keppendur í semi-finale 2 halda uppi sama þema eða hvort þeir bryddi upp á einhverju nýju. Aðalkeppnin verður ekki síður spennandi, er Jóhanna kannski með fleiri ljóta kjóla í farteskinu?

frá mér til mín

2009-05-12T14:55:00.003Z

Keypti mér þennan dásamlega Rules by Mary kjól í afmælisgjöf.

mér finnst þetta fínt

2009-05-10T19:56:00.002Z

wounds from the war

2009-05-09T17:38:00.003Z

Þegar ég kom heim úr seinni skylduferðinni til Nam, nei alveg rétt, það var ekki ég heldur gaurinn í myndinni sem ég horfði á gær. Ég er bara fornleifafræðingur sem blæddi nánast út yfir hálft lærið á sér án þess að taka eftir því! (ok, kannski smá ýkjur með magnið en það var samt fullt af blóði).

allan daginn út´um bæinn

2009-05-07T20:57:00.004Z

Byrjaði í feltkúrsi í Karsvik í Bromma á mánudag. Ég og Inga, íslensku sérfræðingarnir, erum soldið sér á báti þar sem við erum í öðru prógrammi heldur en allir hinir og ráðum okkur því svolítið sjálfar s.s. við liggjum í sólbaði allan daginn. Við erum aðallega að taka fosfatsýni á svæðinu okkar og fyrir utan það til að geta kortlagt allt svæðið.
Virkar reyndar pínu eins og við nennum ekki að "hanga" með hinum. En við erum allavega að rannsaka nokkuð stórt svæði með fjölmörgum rústum á, allt frá eldri bronsöld (sennilega) til víkingaaldar. Fékk smá kennslu á tvímennings alstöð í gær sem var bara nokkuð skemmtilegt, fullt af tökkum til að fikta í, en svo erum við með aðra alstöð sem maður getur notað einn og ég á eftir að læra almennilega á hana. Annars er ekkert mikið annað um að vera þessa dagana, fór á Serrano í gær í Vällingby sem er stutt frá Karsvik en laaangt heiman frá mér. Fékk mér minn eigin spes burrito sem var rosalega góður svo ég og Inga erum að spá að fara aftur í næstu viku og fá okkur annan fix. Á morgun er ég svo að vinna inn á labinu að greina sýnin o.fl. svo ætlum við að grilla og drekka öl fyrir utan deildina í lok dags. Jättekul!

gefins

2009-05-06T20:16:00.002Z

ónothæfur spilastokkur í splunkunýju ástandi fæst gefins gegn því að hann verði sóttur.

í tilefni dagsins

2009-05-05T19:17:00.005Z

ákvað ég að deila einhverju með ykkur. Fékk trilljón afmælisóskir í dag m.a frá Ingu, Söndru, mafíunni og konunni á pósthúsinu. Fékk líka pakka

Í pakkanum sem var frá mafíunni var þessi dásamlegi fjólublái Forynju-hettupeysukjóll

Frá Manna fékk ég líka þennan yndislega kveðskap sem ég pósta hér án leyfi höfundar en þar sem þetta er MÍN afmælisgjöf þá hlýt ég að eiga þær.

Kveðju ég sendi þér kæra,
kyrja fuglar sumarbrag.
Lúin samt en þarf að læra,
Lífið bíður góðan dag.

gráttu ei ó gugga mín,
þótt gömul sé bæði og fúinn.
þótt línurnar hverfi og lífsorkan dvín,
og æfi þín líklega búin.

Inga leyfði mér líka að ráða í dag í uppgreftinum okkar, ætlaði að vera búin að baka köku og koma með í dag en heilsan á sunnudaginn leyfði ekki slíkt. Skulda þér köku Inga.
Hélt svo líka upp á daginn með að fara í tásuviðgerð, fann eina frábæra tásuviðgerðakonu í hverfinu mínu svo nú get ég búið endalaust í Stokkhólmi með tásuviðgerðakonu og dásamlegan klippara (sjá flottu klippinguna mína í fyrri pósti :)).
Það var frekar kalt í dag sem var svindl af því +eg var búin að panta spes afmælisveður en það var svo kalt að ég var í gammó og Inga líka, var samt ekkert að spyrja hina grafarana með okkur hvort þau væru líka í gammó en kannski tékka ég á því á morgun.

Einhverstaðar las ég að maður ætti alltaf að taka mark á draumum sem maður dreymdi á afmælisdaginn sinn svo hér kemur hann:

Dreymdi að ég væri komin heim til Íslands og ætlaði í háttinn. Kom mér fyrir til fóta í rúminu hjá mömmu og pabba!
Held að draumar séu bara bull og vitleysa og ekkert mark takandi á þeim.
Eða er sjálfið kannski 3 ára en ekki 23 ára?

Orð dagsins: standandi snúrur = þvottagrind

allt af...nánast

2009-04-24T11:01:00.003Z

ég fór í klippingu hér í Stokkhólmi um síðustu helgi og hef ekki verið með jafnstutt hár í ...ja alveg rosalega mörg ár. Tók svona 360° á þetta svo að allir gætu nú dáðst að fínu klippingunni minni!

Kosningar

2009-04-21T18:00:00.003Z

Ég og Inga fórum að kjósa í gær. Til þess fórum við í sendiráð Íslands hér í Stokkhólmi. Framkvæmdin á svona utankjörfundar dæmi er svoooolítið öðruvísi en þegar maður fer á kjörstað. Fyrir það fyrsta þá er ekki nóg að vita hvað flokkurinn heitir sem maður er að spá í eða ætlar að kjósa heldur þarf maður að vita listabókstafinn líka því maður þarf að handskrifa eða stimpla listabókstafinn á auðan seðil. Ef maður vill svo strika einhvern út af þeim lista sem maður kýs svo þá þarf að leggja nöfn allra á listanum á minnið, skrifa þau á seðilinn í réttri röð og strika svo einhvern vitleysinginn út! Ekki nóg með þetta heldur tímir sendiráðið svo ekki að splæsa í frímerki á atkvæðaseðilinn heldur þarf maður svo að póstleggja hann sjálfur! Greinilega kreppa á Íslandi. Mér finnst þetta ekkert rosalega hvetjandi til að maður nýti sér atkvæðisréttinn en þetta hafðist nú allt saman hjá okkur, kusum rétt og sendum seðilinn af stað til Íslands med det samme. Ég nennti þó ekki að hafa fyrir því að strika út af listanum sem ég kaus eins og ég hef gert áður ef mér líkar ekki við einhvern á framboðslistanum. Mundi hvort eð er ekkert hvar í röðinni sá vitleysingur er né hverjir aðrir eru þar, fyrir utan manneskjuna í fyrsta sætinu. En hún er einmitt ástæðan fyrir því að í ár ákvað ég að kjósa manneskjur og málefni í staðinn fyrir flokk. Ég veit að það er reyndar ekki beysið framboð til kosninganna nú frekar en fyrri daginn (allir ljúga og svíkja) en þó hef ég ákveðið að kjósa alltaf skársta kostinn í stað þess að skila auðu. Að skila auðu ætti að vera ákveðin yfirlýsing en þar sem auðir og ógildir eru taldir saman þá liti ég meira út eins og fífl sem kann ekki að fylla út kosningaseðil en manneskja með meiningar!

P.s ég kaus að sjálfsögðu Katrínu Jakobs í Vinstri-grænum.

Að horfa á kvikmynd er góð skemmtun.

2009-04-16T21:29:00.001Z

hef bara eitt að segja um bíóhús Stokkhólmsborgar, það eru númeruð sæti!

vorið kom með vindinum...

2009-04-12T20:05:00.006Z

jebb, vorið eða sumarið er held ég bara komið til Stokkhólms og erum við Inga búnar að spóka okkur um í allri sólinni. Í dag skelltum við okkur ásamt meðleigjendum Ingu, Nok og Yumiko, í göngutúr í Djurgården, tókum ferjuna frá Slussen þangað yfir (bara smá spotti) og röltum svo yfir í Rosendalgården sem er grasagarður Stokkhólmsbúa. Sólin skein og fuglarnir sungu. Tókum svo sporvagn tilbaka inn á Norrmalmstorg.

Séð yfir að Gröna Lund tívolíinu í Djurgården

Kaup á þessu húsi eru komin á 10 ára planið!

Inga, Nok og Yumiko á strollinu

Bellman var líka í Djurggården ekkert stroll á honum samt

Ætla pottþétt aftur að taka sporvagninn en ætla að prófa kaffisporvagninn næst

algjör mús!

2009-04-11T14:36:00.004Z

Thelmulingurinn minn var að sýna á balletsýningu fyrir stuttu og var mýsla. Stóð sig víst voða vel. Því miður hefur mér ekki tekist að sjá hana sýna en vonandi kemur að því. Í staðinn stal ég bara þessari mynd af netinu.

flakka, flakka til og frá

2009-03-29T19:26:00.003Z

jebb, á morgun ætla ég á smá flakk með skólanum. Förum til Halland að skoða fornleifar og munum gista í Gautaborg. Nú þarf ég því að fara að pakka svo ég gleymi nú ekki öllu sem ég þarf að hafa með. Var annars frekar dofin í dag, fór á Vintage Mässan í dag og svo gleymdi ég að fara úr lestinni heima hjá mér. Þannig rúntaði ég bara með henni á næstu stöð og svo til baka aftur en þá stóð ég sko í dyrunum tilbúin að stökkva af!
Set inn af Hallandsferðinni þegar ég kem til baka og aldrei að vita nema myndirnar úr Ölandsferðinni í Október rati bara inn í leiðinni.

uppá síðkastið...

2009-02-22T16:46:00.010Z

búin að vera löt að blogga að undanförnu...bara búin að vera svolítið bissý við að vera í skólanum og læra..ehh..eða ekki..ég hef bara ekki nennt að blogga. Bætum aðeins úr því nú...fór í sumarbústað/sumarhús með Elinu, Ingu og Olle fyrir nokkru, það var rosa næs..borðuðum góðan mat, fórum í göngutúra m.a. yfir ísilagt vatnið sem er rétt hjá bústaðnum, kveiktum upp í arninum og höfðum það rosa kósý.

Sumarhúsið sem foreldrar Elinar eiga er í Norrehus rétt fyrir sunnan Linköping.

Ég að sýna"listir" mínar á ísnum..

Fyrir hálfum mánuði fórum við Inga svo ásamt þremur öðrum íslenskum stelpum (Auði, Völu og Kristínu) á skauta í Kungsträgården..rosa gaman þar til Inga datt á hnén og við enduðum upp á slysó þar sem kom i ljós að Inga var með brákaða hnéskel og var sett í spelku..svo nú köllum við hana fatlafólið...

Dancing on ice.. hvað!

Auður, Inga og Kristín

Inga á slysó meðan okkur fannst þetta enn fyndið..enda bara búnar að bíða í 2 tíma..ekki 9 tíma...og vissum ekki alvarleika íþróttameiðslanna!

Gunnar "hinn þolinmóði" farinn frá Lín Svín!

2009-02-04T17:39:00.002Z

þrefalt húrra fyrir Katrínu Jakobs...því samkvæmt frétt þessari í DV munu námsmenn nú líta bjartari daga þar sem eðal-svínið Gunnar Birgison mun væntanlega fara á haugana ásamt öðrum ófögnuði sem Lín Svín mun hafa sankað að sér síðustu áratugi. Hinum þolinmóða manni þykir menntamálaráðherra sjálfsagt jafn óþolinmóð og námsmennirnir sem báðu um neyðarlánið alræmda!

Kannski hefur Katrín fengið hugskeytið frá mér í gær? Sagði nefnilega Ingu í gær að ég væri að hugsa um að senda henni bréf og inna eftir aðgerðum í málum Lín Svín, sérstaklega vegna námsmanna erlendis. Ákvað svo að ég nennti eiginlega ekki að skrifa bréf í gær þegar ég var við tölvu upp í skóla (munið að tölvan mín er dáin = engin tölva heima). En nú verð ég kannski bara að senda henni frekar þakkarbréf?

óheppin týpa!

2009-02-03T15:29:00.002Z

Arkaði af stað í gær vel múruð eftir að hafa betlað meiri pening sem ég get skuldað bankanum mínum til að kaupa nýja tölvu. Venjulega myndi það gleðja mig ofsalega að kaupa mér nýja tölvu en þessi tölvukaup vekja upp blendnar tilfinnnigar. Mér þætti betra að eiga í raun pening fyrir nýrri tölvu en gamla tölvan mín er ekkert að kippa sér upp við slíka smámunasemi í mér...hún deyr bara þegar henni þóknast! Eftir að hafa íhugað þetta vel á leiðinni í lestinni var ég bara orðin nokkuð spennt yfir nýju tölvunni...hvítri MacBook...var búin að skoða hana reyndar heima á Íslandi (svo eiga Sandra og Bryn báðar svoleiðis) og er hún náttlega miklu betri heldur en mín gamla (sem er hvít iBook) og er að verða fjögurra ára gömul.
Þegar ég loksins kom í Humac búðina sem er nánast í hinum enda borgarinnar var ég vægast sagt orðin mjög uppveðruð yfir því að fá nýja tölvu...eftir að hafa verið með gömlu tölvuna í andarslitrunum í viku og þar með geta lokst haldið áfram með verkefni og allt annað sem ég þarf að gera. Kom svo í búðina og bað um aðstoð og sagðist þurfa að kaupa tölvu. Afgreislumaður vildi endilega sýna mér allt úrvalið þeirra = allar dýrustu týrpurnar, en ég sagðist vera búin að skoða þessa hvítu (sem jafnframt er langódýrust) og mér litist vel á hana. Sagði hann mér þá að það væri mjög gott val þar sem það væri ný búið að uppfæra ýmislegt í þeirri tölvu, s.s vinnsluminnið, skjáupplausnina o.fl. "Flott" sagði ég, "ég ætla að fá eina" "Öhh, hún er því miður ekki til á lager, er í pöntun!" sagði maðurinn þá. Hann hefur væntanlega séð mig fölna og nánast falla í yfirlið því hann flýtti sér að bæta við að vonandi kæmi hún eftir 4-5 daga, það væru bara 10 dagar síðan hún kom út í Bandaríkjunum svo sendingin væri á leiðinni. Ég var að spá í að taka smá frekjukast, kasta mér í gólfið og grenja en ákvað svo að það myndi sjálfsagt ekki hafa neitt að segja nema kannski að mér yrði vísað út úr búðinni..svo ég gaf bara upp símanr. mitt og hann lofað að hringja þegar tölvan mín kæmi. Vonbrigðin voru SVAKALEG get ég sagt ykkur þar sem ég var orðin svo spennt en svo bara engin tölva til að fara með heim...nema reyndar miklu dýrari tölvur.

upprisin er hún...húrra húrra...

2009-01-29T22:03:00.002Z

það ætlar ekki að sjá fyrir endann á þessum tölvuvandræðum mínum! Tölvan mín dó s.s. aftur á þriðjudagskvöldið og leit þá út fyrir að hún væri búin að gefa upp öndina endalega..en nei, í dag reis hún aftur upp frá dauðum en bara í ca.klst...þá dó hún aftur. Svo reis hún upp aftur nú seint í kvöld og er búin að tóra núna í rúma klst. Á endanum nær hún að slá út vinningshafann sjálfan í upprisukeppninni ....

Er annars að fara út á land á morgun...ætla í sumarbústað með Ingu, Elinu og vini hennar í bústað sem foreldrar Elinar eiga einhverstaðar nálægt Linköping, held ég. Ætla að vera Pollýanna um helgina og slappa af...takast svo á við tölvukrísu aftur á mánudag...

Grátur og gnístan tanna!

2009-01-26T14:40:00.003Z

jebb, tölvan mín dó í gær! Allt í einu slökknaði bara á henni þar sem ég var að vinna í fyrirlestrinum og ritgerðinni sem ég á að skila á morgun! og ég gat ekki með nokkru móti kveikt á henni aftur. En eftir að hafa panikað, grenjað og fríkað út...í þeirri röð...hafði ég samband bæði við Söndru og Breka...Söndru út af möguleikanum á samskonar vandamálum með samskonar tölvu og þeirri staðreynd að það er alltaf möguleiki á samskonar veseni á okkur...með allt! og Breka vegna óendanlegrar visku hans um tölvur og tölvuvandamál...Svo eftir að hafa heyrt frá þeim og möguleikum á vandamálalausnum fríkaði ég aðeins minna út en endaði á því að fara í heitt bað til að slaka á...því ekkert gerðist með helv..tölvuna og ég varð bara að bíða og reyna að kveikja á henni öðru hvoru. Það gekk svo eftir seint í gærkveldi og þa virtist vera allt i lagi með hana, öll gögn ennþa til staðar nema það sem ég var búin að gera um morguninn svo ég er búin að vera að gera það allt aftur í dag. Breki tékkaði svo á henni þegar hann koma heim og það virðist ekkert hafa beint hrunið en hann hafði samband við einhvern mactölvugaur í dag sem sagði að þetta gæti gerst þá og þegar aftur og þá væri alltaf hætta á því að hún myndi ekki rísa upp frá dauðum aftur!!! Hún er þar að auki í slow motion og alltaf að frjosa öðru hverju...fyrir utan svona dinti eins og að setja ekki kommu yfir stafi nema þegar henni hentar..eins og sest i þessum pósti...er hætt að reyna að tala hana til með það...er bara fegin að verkefnin min eru á ensku svo eg þarf ekki það mikið a þessum fjandans kommum að halda..na na na bú bú.
Allavega, þá held ég að ég verði að væla í bankanum fyrir nýrri tölvu á næstunni og enda svo örugglega bara í skuldafangelsi í sumar. Eru ekki annars bara agalega kósy Kvíabryggju...þægileg rum og o.fl. í boði Árna Johnsen?

appelsínugul upprifjun....

2009-01-22T18:12:00.009Z

í tilefni af appelsínugulur.is þá ákvað ég að rifja upp nokkrar appelsínugular minningar...

wish I was there.....

2009-01-16T20:45:00.000Z

akkúrat núna standa yfir útgáfutónleikar í Iðnó hjá Hjörvari í tilefni af nýju plötunni hans A copy of me og mig laaangar rosa mikið til að sjá þá...panta video af þeim.

Þá ætlar hann einnig að frumsýna nýtt myndaband við lagið See the Sea sem er uppáhaldslagið mitt á plötunni...er að fíla plötuna veeel og er einmitt að blasta hana nú í imove græjunum mínum :) svona til að vera með í anda...

P.s. tónlistina hans er að finna á myspace: http://www.myspace.com/hjorvarmusic

Krimmahverfi!

2008-12-17T17:17:00.003Z

omg, ég bý greinilega ekki í friðasælu og fjölskylduvænu hverfi eins og ég hélt, nei, nei, Farsta er greinilega bara eitthvað bölvað krimmahverfi, það er búið að ræna vídeóleiguna, sjoppuna og pizzastaðinn og svo nú síðast var Nordea bankinn rændur með stæl í gærmorgun. Tveir menn, vopnaðir skotvopnum, keyrðu inn í bankann (í gegnum gluggann) rétt fyrir opnun, kveiktu svo í bílnum, rændu peningum og spændu svo í burt á mótorhjólum sem stóðu fyrir utan. Þetta var sem sagt alveg keppnis...svo hér var allt krökkt af löggum og sérsveitarmönnum með byssur og alles, gangandi milli húsa, girðandi af göngu- og akstursleiðir og lögregluþyrlan sveimaði yfir húsinu mínu og fleirum í klukkutíma eða meira. Brjálað aksjón í gangi en ég svaf þetta allt af mér!

Fór avo á STARK julsittning í gær, við í jólanefndinni elduðum allan matinn sjálf og ég gerði ísinn hennar mömmu sem sló svona líka svakalega í gegn ;) Ég og Inga enduðum reyndar í eldhúsinu allt kvöldið ásamt Johan þar sem sumir í nefndinni sem voru búnir að fara mikinn í orðum um eldamennsku sína sátu svo bara fastast að borðum og varð lítið úr verki í eldhúsinu! Ætla að hætta núna að bjóða mig og Ingu (að henni forspurðri) fram í einhverjar nefndir...
Endaði svo mér til mikillar skelfingar á að þurfa að taka NÆTURSTRÆTÓ heim..aftur...komst þó með lestinni rúmlega hálfa leið en nú er ég orðin svo geðveikt lókal í þessum næturvagnafíling að öllum datt í hug að spyrja mig um vagna hingað og þangað...
Ég er kannski bara orðin svona sænsk?
Ég er þó frekar á því að ég líti bara svona traustvekjandi út.

Egótripp verðlaun...

2008-12-14T18:46:00.004Z

Lukkutröllið okkar, flikkuðum aðeins uppá hann með smá gull og glimmer!

Var á AF-gala kvöldi í gærkveldi en þar voru stjórnir allra nemendafélaga innan "Hugvísindadeildarinnar" við háskólann samankomnar, well..allavega þær stjórnir sem mættu. Verðlaun voru veitt fyrir hitt og þetta en ég held að STARK hafi fengið bestu verðlaunin...fyrir besta egótrippið m.a. en við tilnefndum okkur sjálf fyrir meira en 15 tilnefningar..allmargar tengdar einkahúmor í fornleifafræði (svo við myndum örugglega vinna þau verðlaun) og svo unnum við Kariókí-keppnina líka..þökk sé Elinu ;)

Sýninhorn af tilnefningum okkar:

Nemendafélagið með flesta íslendinga í stjórninni.
Nemendafélagið sem er næst gröfinni.
Jarðbundnasta nemendafélagið.
Nemendafélagið með billigasta búsið og fallegasta fólkið.

Nokkrir stjórnarmeðlimir: Elin, Tora, Jonathan, Inga og Ég

Atvinnulaus og heilsuveill eiginmaður óskast!

2008-12-11T22:29:00.002Z

er nokkuð viss eftir símtalið sem ég átti við Lín Svín í vikunni að ég sé ekki ein af þeim "heppnu" einstaklingum sem mun hreppa hnossið í samkeppninni um neyðarlánið svokallaða. Já...samkeppni virðist það vera því fyrir utan að senda inn umsókn um þetta LÁN NB! ekki STYRK þá þurfti ég einnig að rökstyðja af hverju ég teldi að ég ætti að fá neyðarlán. Ekki nóg með það heldur á maður að senda inn fylgiskjöl sem styðja við rökstuðninginn! Það er ekkert tekið fram neins staðar hvers konar fylgiskjöl þetta eiga að vera, bankayfirlit, kvittanir úr matvöruverslunum, myndir úr hálftómum eldhússkápum? Svo ég hringdi í Lín Svín til að fá einhverjar upplýsingar. Ég þurfti reyndar að draga orðin með rörtöng upp úr manneskjunni sem var fyrir svörum en hún klikkti loks út með sp. eins og: "Ertu húsnæðislaus?" "Umm..nei" sagði ég. "Er makinn búin að missa vinnuna?" spurði hún þá. "Uhh..nei, ég er einhleyp" svaraði ég. "Ja, þú getur þá bara sent það sem þér finnst vera viðeigandi" Aha, ég get sem sagt ekki verið í mikilli neyð fyrst ég er ekki á götunni með atvinnulausan eiginmann til að sjá fyrir! Var að spá á að skálda upp eiginmann, láta hann missa vinnuna og ekki væri verra ef hann myndi deyja líka. Held samt að það sé smá ves að falsa bæði giftingarvottorð og dánarvottorð...

gleði, gleði, gleði....

2008-12-08T20:08:00.006Z

já það er eintóm gleði hjá mér þessa daganna. Ég er byrjuð að forverja gripina frá Birka...og það er geðveikt gaman..Er búin að fá vinnuborð og skúffur og smásjá..omg..ég er að verða geðveikur nörd yfir þessu...
Annars er allt og ekkert búið að gerast síðan síðast...það snjóaði meira en svo bara bingó..og allur snjór farinn og varla von á meiru fyrir jól :( ohhh... ég sem ætlaði að búa til snjóengla...
Fór á Onsdag á Gulu Villunni í vikunni og sá nokkra Íslendinga og hitti líka fáeina..var reyndar ekki furða þar sem þetta var Onsdag hjá FÍNS (Félag íslenskra námsmanna í Stokkhólmi) ég og Inga drifum Höllu vinkonu hennar með okkur en þar sem við vorum aðeins með heilann í bandi á eftir okkur, hunsandi allar ábendingar um hvað tímanum liði, endaði kvöldið í annarri magnaðri næturstrætóferð! Gæti örugglega farið að gefa út smásögusafn um reynslu mína af næturstrætóferðum í Stokkhólmi. Í þetta skiptið var vagnstjórinn í svo miklu panikki yfir öllu þessu fólki sem kom allt inn í vagninn á sömu stoppistöðinni við háskólann (hmm skrítið) að hann treysti sér ekki til að rukka alla um kort eða miða heldur kallaði á SL-vörð til að koma og rukka fólk í vagninum! Svo þar sem við sátum og biðum eftir einhverjum verði sem átti að koma bráðum! ákváðum við að kíkja aðeins á aðra stoppistöð og athuga með vagn þar sem átti að fara beint heim til Höllu en þá var það ekki næturstrætó, svo þar sem við röltum tilbaka í vagninn sem beið eftir rukkaranum heyrðum við óminn af brottfarahljóði..rukkarinn kom sem sagt meðan við brugðum okkur á næsta bæ...Þeir eru alveg magnaðir þessir vagnstjórar næturstrætóanna.
Allavega...er búin að segja það áður og á örugglega eftir að segja það aftur "Ég ætla ekki aftur með næturstrætó". Hmm...munur að vera svona staðföst manneskja eins og ég.
Mikið að gera næstu vikunna alveg þangað til ég kem heim 18.DES...forvarslan, Stark fundir, spila-/osta-/vín-kvöld, galakvöld, jólaboð og hvaðeina...og svo verð ég bara komin heim fyrr en varir.

Ekki mjög jólalegt að líta út um gluggann minn

meiri snjó...meiri snjó...meiri snjó...

2008-11-24T22:24:00.003Z

jebb..það er allt á kafi í snjó hér í Stokkhólmi. Reyndar átti ég nú ekki von á því að Svíarnir yrðu svona stressaðir yfir smá snjókomu, en í dagblöðunum í dag var fólki ráðlagt að halda sig heima við í dag og ekki senda börnin sín í skólann...allt vegna smá snjókomu! Sem þeim fannst reyndar vera stormur!! En í alvöru...þá var varla vindur með ofankomunni í dag, komu smá hviður við og við síðustu nótt en ekkert Öræfasveitar rok! En snjókoma þýðir reyndar seinkun á lestunum...þær eru víst ekki alveg gerðar fyrir vetrarveður á norðurslóðum..reyndar ekki haustveður heldur þar sem lauf sem falla á lestarteinanna á haustin valda einnig seinkunum..kannski virka þær bara fínt á sumrin?
En allavega þá þarf ég að fara inn í borg á morgun svo það er eins gott að reikna með þessum "snjóseinkunum"...

Derka/Lock er hér sofandi uppi í rúminu mínu..hann er í fýlu því Breki er í útlöndum svo hann er að prófa aðra staði til að sofa á...hann er þó ekki alveg kominn á fullt í hunguverkfallið eins og vanalega..

Meðalaldur 75 ár!

2008-11-18T20:24:00.004Z

Var á fyrirlestri áðan uppi á deild og ég get svarið það..held að meðalaldurinn hafi verið yfir 70 ár. Reyndar höfum ég og Inga væntanlega lækkað hann kannski niður fyrir 60. En ág sat við hliðina á Björn Ambrosiani, sem er einmitt áttræður, og var að reyna að telja í mig kjark að kynna mig og ritgerðarefnið mitt en guggnaði á því :(
(fyrir ykkur sem eruð ekki fornleifafræðingar þá er Björn Ambrosiani mjög þekkt nafn í skandinavískri fornleifafræði og gróf um árabil í Birka en þaðan er einmitt efniviður meistararitgerðar minnar). En það var s.s. svona lið eins og hann og prófessorar héðan og þaðan og svo ég og Inga!

En að öðru..,þá var Sandran í heimsókn hjá Guggunni um helgina og það var roooosa gaman. Við ráfuðum um bæinn og svo bauð hún mér út að borða á föstudagskvöldinu á veitingastað í SoFo sem heitir Little Persia og er eins og nafnið gefur kannski til kynna..persneskur veitingastaður. Maturinn var ofsagóður en þjónustan ekki eins ofsagóð! Inga, Óskar og Elin komu svo og hittu okkur þar og fengu sér öl með okkur. Á laugardeginum fórum við Sandra svo og hittum mömmu hennar og móðursystir sem komu frá Uppsala, mamma hennar bauð okkur í hádegismat, fórum á hlaðborð í Saluhallen við Östermalmstorg, þannig að konan mín og tengdó héldu mér s.s. uppi um helgina ;) ekki slæmt að fá svona heimsóknir þegar maður er fááátækur stúdent... takk fyrir komuna Sandra og co...

ég, Sandra og veggurinn vinur okkar! (Inga myndasmiður tók þessa mynd)

Óskar, Elin, Sandra og nefið á Ingu

Inga Hlín bjútíkvín og Óskar

Önnur tilraun og nú án veggsins! (þessi nær-mynd er í boði Ingu illkvittnu)

Sandra er að koooooooma!!!

2008-11-13T18:49:00.003Z

ohh..ég hlakka svo til því Sandra er að koma í heimsókn til mín á morgun! já já það eru bara allir að fá kærustur/kærasta í heimsókn um helgina..ég, Inga, Jonathan...:)
Sandra verður reyndar bara fram á laugardag en við þurfum þá bara að nýta tímann enn betur. Ætlum að ráfa um borgina aðeins og fara svo út að borða á morgun...afskaplega rómó allt saman...og kíkja svo eitthvað út á lífið. Það verður ofsa gaman að fá hana í heimsókn þótt stutt sé..sko heimsóknin...ekki Sandra.
Annars er ég búin að vera frekar mikill innipúki þessa vikuna þar sem búið er að rigna mikið svo ég ákvað að vera ekkert að bleyta mig heldur vera bara inni og lesa aðeins fyrir skólann. Fór svo loks út í dag og upp á háskólabókasafn sem ég er alveg gjörsamlega búin að finna út að ég bara þoli ekki..m.a. vegna heimsks flokkunarkerfis. Þannig að ég held að Vitterhetsakademiens bibliotek (bókasafnið hjá Riksantikvarieämbetet) verði fyrir valinu hér eftir enda eiga þeir nánast allar bækur og greinar tengdar fornleifafræði sem gefnar hafa verið út í Svíþjóð. Ég fór á kynningu þangað um daginn og fékk bókasafnskort þar og alles svo ég held að það sé bara málið héðan í frá.

Læt nokkrar myndir frá Halloween á Gulu villunni og stjörnuspánna mína fylgja hér þó svo ég sé ekkert of hrifin af svona skynsemistali:

Naut: Freistingar láta á sér kræla. Flas er sjaldan til fagnaðar. Allir hafa gott af því að sjá að það er ekki allt sjálfgefið í þessum heimi.

Jonathan ákvað að vera sænskur (hann er þjóðverji) og fékk verðlaun fyrir ljótasta búninginn

Cissi a.k.a Pumkin og Kerstin the 60's girl

Pontus (kærasti Cissi) og vinur hans fengu verðlaun sem besta parið!

Inga Kahlo!

Fólk var nú ekki alveg með það á hreinu hvað ég var en mér finnst það mjög augljóst...Agúrka!!

ER EKKI VERIÐ AÐ GRÍNAST Í MÉR!!!!!!

2008-11-11T22:10:00.003Z

ég er svo sótill út í LÍN akkúrat núna að það gjörsamlega sýður á mér. Ég var að skoða umsóknina um þetta svo kallaða "neyðarlán" sem á að veita námsmönnum erlendis. Þar kemur fram að ef ófyrirsjánleg röskun á stöðu og högum hefur orðið hjá námsmanni erlendis er heimilt að veita honum aukalán sem nemur allt að framfærslu tveggja mánaða.Þar er hinsvegar einnig tekið fram að þetta er eingöngu fyrir þá sem teljast í "sárri neyð"! Með umsókninni þarf svo að fylgja skrifleg skýring og/eða rökstuðningur og gögn sem staðfesta breytta stöðu umsækjenda. Hver umsókn verður tekin sérstaklega fyrir og metin af stjórn sjóðsins og umsóknir án fylgiskjala verða ekki teknar fyrir!
Hvað er eiginlega verið að meina með þessu rugli! Hvern fjandan á maður eiginlega að senda inn með umsókninni. Matarkvittanir úr Lidl (lágvöruverslun) til að sýna fram að að til þess að eiga fyrir mat getur maður ekki verslað annar staðar. Bankayfirlitið sem sýnir að leigan mín hefur hækkað um tæpar 10.000 isk milli sept og okt? Kvittanir fyrir lestarkortinu sem maður þarf að kaupa til að komast í skólann? Ég er bara ekki alveg að fatta þetta!
Þar fyrir utan talaði ég við LÍN í síðustu viku vegna þess að ég gat ekki sótt um frestun lánsloka á vefnum hjá þeim (hlekkurinn virkaði ekki). Átti að sækja um þetta fyrir 11.nóv svo ég þyrfti ekki að fara að byrja að borga af námslánunum úr B.A. náminu meðan ég væri í framhaldsnámi erlendis! En nei þá var mér tilkynnt það af ráðgjafa hjá LÍN að ég hefði þurft að vera í lánshæfu námi síðasta vetur líka til að fá þessa frestun. Ég sagði konunni að mér þykir það undarlegt þar sem ég hafði samband við LÍN í vor og þá var mér sagt eins og áður að þar sem ég útskrifaðist úr B.A. námi í febrúar 2007 ætti ég að geta fengið þessa frestun ef ég byrjaði í ramhaldsnámi innan 2 ára frá útskrift! "Já, en það var samkvæmt gömlu reglunum" sagði konan þá. "Í sumar voru samþykktar nýjar og breyttar reglur sem kveða á um þetta". "Og ég þarf þá s.s. að byrja að borga af gamla láninu nú á mars/apríl sem er þá væntanlega um 80.000 kr?" Já það er rétt" sagði konan. "Hvernig eiga námsmenn erlendis eins og ég sem allir eru í fjárhagsvandræðum vegna gengislækkunnar íslensku krónunnar og rétt geta borgað leigu og mat, að greiða svo af námslánunum líka?" "Nú þeir verða bara að borga leigu og mat og greiða af láninu líka" sagði hún glaðlega!!!
Ég varð bara svo hissa á viðmótinu að ég bara þakkaði fyrir og lagði á.

Slattapartý og strætóferð...

2008-11-06T10:42:00.002Z

fór á stjórnarfund hjá STARK í gær og slattapartý upp í Gulu villunni. Stark átti nefnilega nokkurn slatta af áfengisflöskum sem var bara smá slatti eftir í og við ákváðum að fækka áfengistegundum í sölu á pöbbnum.. svo stjórnin ákvað að taka að sér það verkefni að klára þessa slatta úr flöskunum...s.s.slattapartý. Slatti er slatte á sænsku en Jonathan misskildi þetta aðeins fyrst...slutpartý...tek það fram að hann var að hugsa þetta á ensku...ekki sænsku! En allavega eftir að við náðum að klára slattana úr velflestum flöskunum ákváðum við Inga og Elin að vera aðeins lengur og fá okkur einn öl eða svo á pöbbnum en það var Onsdag á Gulu villunni. Um eittleytið ákváðum við svo að fara heim en þegar við komum niður á T-bana var næsta lest kl.05.04..úpps..föttuðum það ekki alveg að það væri virkur dagur og því engar lestar á nóttunni. En sem betur fer gengur strætó alla nóttina á virkum dögum svo við hoppuðum upp í strætó og rúntuðum um nánast alla borgina. Ég þurfti sum sé að taka 3 vagna til að komast heim til mín og með bið á stoppistöðvum (10-30 min) þá tók ferðin tæpar 2 klst!

So..Now i'm feeling dangerous, riding on city buses for a hobby...

Enn í heimaprófi...

2008-10-30T19:20:00.002Z

jebb..síðasti dagur heimaprófsins í dag..á að skila kl.10 í fyrramálið sem þýðir að sjálfsögðu að ég mun klára að skrifa undir morgun og hendast svo uppí skóla til að prenta út og skila inn. Cissi sagði mér í dag að Robin sem er með okkur í kúrsinum hefði skilað inn á mánudaginn! Ég meina..hver gerir svona hluti! Aldrei að vera á undan með neitt er mitt mottó...reyndar er það bara staðreynd en mér finnst það bara hljóma betur ef ég læt sem það sé mottó..ekki satt?
Annars er nú ágætt að þessi vika heimaprófsins sé senn á enda. Er farin að fíla mig eins og Hugh Hefner..í náttfötunum allan daginn! Reyndar bý ég ekki með 3 kærustum..svo það er sennilega bara náttfatafílingurinn sem ég og Hef gamli eigum sameiginlegt.
Er samt búin að vera dugleg að fylgjast með umheiminum þá ég fari ekki út úr húsi þökk sé internetinu..hvað gerði fólk í heimaprófum áður en internetið kom til sögunnar? En nú eru Færeyingar farnir að lána okkur Íslendingum peninga! Tilfinningin svolítið eins og ég fengi lán úr sparibauknum hjá Victori jr. þó hann mundi örugglega setja fleiri skilyrði fyrir láninu en Færeyingar!

Stjörnuspá dagsins finnst mér skemmtileg svo ég ákvað að skella henni með.

Naut: Það er meira áríðandi að vita hvað þarf að gera, en að gera það. Það er viturlegt að hefjast ekki handa við verkefni dagsins án þess að skipuleggja sig.

s.s. aldrei að gera neitt í dag sem þú getur gert á morgun!

alltaf að græða....

2008-10-27T19:14:00.005Z

græddi heilan klukkutíma í gær þegar Svíar og aðrir Evrópubúar (nema Ísland) færðu klukkuna aftur um 1 klst. Munar um minna þegar maður er í heimaprófi! Það er s.s. orðið bjartara fyrr á morgnana en svona almennt fyrir EKKI morgunmanneskjur eins og mig er að sama skapi komið myrkur fyrr eða um fimmleytið á daginn. Hmm.. veit ekki hvort ég er svo hrifin af þessu...var það ekkert sérstaklega þegar ég bjó í York og hef ekki enn fundið morgunmanneskjuna í mér...kannski er hún bara ekki til staðar. En allavega þá er ég sem sagt í heimaprófi sem gengur hægt en gengur þó, ég þarf þó víst ekki að örvænta miðað við stjörnuspánna mína í dag:)
Naut: Þér finnst þú vera að missa af vissum lærdómi eða að það séu gloppur í vitneskju þinni. Reyndin er sú að þú er frumlegri og einstakari því þú ert ótamin

Svo nú er ég búin að ákveða að pósta stjörnuspánni minni á hverjum degi svo ég geti deilt þessari dásemd með öðrum...nema þegar stjörnuspáin er leiðinleg...þá á hún við HIN nautin EKKI mig.

Tókum okkur annars smá pásu á föstudagskvöldið frá lærdóm og skelltum okkur á
barinn...

Trisha, Jonathan og Cissi

Facebook profile-mynd

Inga og Elin í góðum fíling

Elin var mjög impóneruð af pósunum okkar Ingu

loksins...loksins...

2008-10-20T21:13:00.002Z

er ég mætt á skype! Alla som vil prata med mig på skype...kom nu! Á morgun samt, er sybbin núna og þarf að fara að sofa. Gekk samt ekki vandræðalaust að koma þessari nýju tengingu (pungnum) í gagnið. Sem betur fer bý ég með tölvusnillingnum honum Breka! Er farin að halda að öll tölvu-etwas viti af því og þess vegna er ekkert einfalt varðandi tölvur og tengingar hjá mér....Breki greyið vissi ekki hverju hann átti von á þegar mamma hans ákvað að leigja mér herbergi. Algengt er t.d. að heyrist í mér: Uhh..Breki, tölvan mín...

Thungur krísur; bankur pankur; frågor?

2008-10-19T17:12:00.002Z

já Svíum finnst gaman að gera grín að okkur...er farin að skilja hvernig Hafnfirðingum líður.

Öland og Októberfest!

2008-10-18T12:18:00.004Z

Öland var í einu orði sagt frábært. Ofsalega fallegt þar og fullt fullt fullt af flottum fornleifum. Við ókum um alla eyjuna og skoðum s.s. fullt af þessum fornleifum s.s grafhauga, steinsetningar, borgarvirki o.fl. samt er víst hellingur sem við skoðuðum ekki. Gistum á farfuglaheimili í Borgholm sem var mjög fínt og gátum eldað okkur sjálf þar og náttlega haldið eldhúspartý! Ég lét plata mig í stjórn STARK sem er nemendafélagið í fornleifafræðinni svo nú getur maður aldeilis troðið sér á framfæri..nei segi nú bara svona...en þetta er gott tækifæri til að taka þátt í skipulagningu á því sem er að gerast í nemendafélaginu og svo var ég að vinna á pöbbnum okkar í gærkveldi enda ekki óvön manneskja þar á ferð ;)(Kirkjubæjaklaustur 2006 sælla minninga) En félög innan húmanisku deildarinnar reka saman pöbbinn Gula villan á campus svæðinu og STARK á eitt föstudagskvöld í mánuði þar. Ég mun setja inn fleiri myndir seinna í dag eða á morgun..læt vita..

Hádegisnesti í Köpingsvik

Bátssteinsetning við Gettlinge gravfelt

Karlevi Rúnasteinninn

Eldhúspartý

Klettaristur fyrir utan Norrköping

Eniga meniga....ég gat tekið út peninga!

2008-10-12T17:07:00.003Z

jess, ég gat tekið út pening í hraðbanka í gær..veit samt ekki hvort það á eftir að breytast eitthvað í vikunni þar sem fréttirnar segja að á morgun kemur í ljós hvert stefnir í efnahagsmálum á heimsvísu..en allavega nóg um það..svona krepputal er bara niðurdrepandi og þó að ástandið hér sé ekkert alvarlegt.ennþá, þá er ég farin að finna fyrir hækkandi vöruverði hér í Svíaríki svo ekki sé nú talað um gengi íslensku krónunnar..sé nú litla dýra Ísland í hillingum...en nú eru sambærilegar vörur dýrari hér en heimi m.a. út af genginu.
En af því að kreppa er svo niðurdrepandi þá ákváðum við Inga að lyfta okkur aðeins á kreik í gærkveldi og héldum út á bar í SoFo á Södermalm..bara fín stemmning.
Veðrið er bara búið að vera ágætt hér þó að í síðustu viku dró ég upp kápuna mína þar sem það kólnar svolítið seinni partinn svona þegar sólin fer ;)
Skólinn er á fullu, er að fara í pallborðsumræður eftir næstu helgi og svo vikuheimapróf í lok mánaðarins í einum kúrsi. Í nóvember byrja ég svo í öðrum kúrsi, Siðferði og Vísindi, og svo er ritgerðarefnið mitt komið á hreint! Fer að byrja á því fljótlega með hinum kúrsunum en eins og ég sagði áður mun ég gera griparannsókn frá Birka .Þar fannst hús sem er að hluta til undir ´The Warrior House´ og er þar af leiðandi eldra en það. Ég á s.s. að skoða gripina sem fundust í því húsi, forverja þá með forverðinum á deildinni,og finna út úr því hvað þeir eru og til hvers þeir voru notaðir og þannig komast að einhverri niðurstöðu um hvaða tilgangi þetta hús þjónaði. Ég mun einnig skoða einhver sýni með lífrænum leifum úr þessu sama húsi. Ég er að míga á mig af spenningi yfir þessu verkefni og hlakka geðveikt til að byrja. Það hafa fundist svakalega flottir gripir í Birka og Lena, leiðbeinandinn minn, sýndi okkur Ingu nokkra gripi sem geymdir eru uppá deild og maður slefar bara...
En já, svo er Öland á morgun. Förum eldsnemma í fyrramálið og komum aftur á fimmtudagskvöld. Segi ykkur allt frá því þá.

Heilaæxli?

2008-10-10T17:18:00.003Z

held að ég sé búin að horfa á aðeins of mikð af læknaþáttum undanfarið (s.s.heilu seríurnar af Grey´s Anatomy og House) því fyrir utan að vera fá hjartaáfall þegar mig verkjar í vinstri handlegginn, þá er ég orðin viss um að í hvert skipti sem ég fæ höfuðverk sé ég komin með heilaæxli eða einhvern ofur-sjaldgæfan taugasjúkdóm sem veldur einhversskonar bilun í heilaboðum...uhh..eða kannski er ég bara með Munchausen heilkenni.

Þú brennir peninga...með því að...

2008-10-07T20:01:00.003Z

vera á íslenskum námslánum í erlendu ríki í dag! Já já, íslenska krónan er farin að slaga upp í Zimbabve dollara í óstöðuleika og almennri vitleysu...veit varla hvort maður á að fara að versla í matinn í dag eða í næstu viku í von um að gengið lækki. Hinsvegar með að bíða gæti svo farið maður hefði ekki efni á að versla í matinn yfirhöfuð. Stórkostleg tímasetning að ákveða að fara í nám erlendis. Það kreppir verulega að skónum hjá íslenskum námsmönnum erlendis þessa daganna...bráðum komast þeir ekki í skónna! En fyrir utan almmenna fátækt er allt gott að frétta hér frá höfuðborginni. Er að komast á skrið með ritgerðina mína en í náminu mínu áttu helst að vera búin að ákveða hvað þú ætlar að skrifa um (eftir rúmt ár) áður en þú byrjar í náminu. Ég var ekki alveg svo framarlega á merinni með þetta en mánuður finnst mér nú bara býsna gott til svona ákvörðunnar. Er að fara hitta leiðbeinandann minn á föstudag og þá skýrist allt betur en ég mun gera einhvers konar griparannsókn frá Birka.
Var hinsvegar í semnari í dag um Pompeii (en þangað hef ég einmitt komið..ligga ligga lái) og las ofurspennandi grein um nýlega rannsókn á gusthlaupinu sem grandaði borginni árið 79 e.o.t. Þar er m.a. skoðað í hvað fasa af gosinu íbúrnir dóu, hvort það var í vikurfallinu sem kom fyrst, gusthlaupinu sem fylgdi á eftir eða vegna öskufallsins seinast og eitraðra gastegunda. Á greinina í pdf-skjali ef einhverjum langar að lesa..ok, nú er ég búin að nördast nógu mikið með fornleifafræði...svo að öðru...ég er að fara til Öland á mánudaginn næsta með skólanum að skoða fullt fullt af flottum fornleifum (var víst ekki alveg búin að nördast með fornleifafræðina) en þar eru bæði kumlateigar, steinsetningar og margt fleira áhugavert.

slow motion og menningarlegheit...

2008-10-04T16:21:00.005Z

var í hálfgjörðu slow motion í morgun...ætlaði að hitta Ingu inn í borg um hálf ellefu en þar sem tíminn leið ofur-hratt í morgun, eða þá ég svona hægt, þá var ég ekki komin fyrr en að verða ellefu. Rétt missti meira að segja af lestinni sem ég ætlaði að taka þegar ég var loks búin að koma mér út úr húsi, ákvað að sleppa áhættulestaratriðinu þessa vikuna og taka bara næstu. Missti nefnilega næstum því af lestinni um daginn en ákvað samt að spretta úr spori og flaug í gegnum kortahliðið, tók rúllustigann í þremur skrefum og þaut svo á hlið innum lestardyrnar sem voru þann mund að lokast og "slædaði" svo yfir gólfið. Uppskar m.a. klapp frá þéttsetnum lestarvagninum! Í dag ákvað ég hinsvegar að láta áhættuatriðin s.s. vera og treysta því að Inga yrði seinni en ég :)
Annars vorum við svo agalega menningarlegar...fórum á sýningu í Konstakademien þar sem verk vinningshafa og tilnefndra listamanna Carnegie Art Award voru til sýnis. Get hiklaust mælt með þeirri sýningu og ekki skemmir fyrir að það er engin aðgangseyrir. Þaðan skelltum við okkur svo á Moderna Museet og ráfuðum þar um heillengi að skoða það sem var í boði og var þessum 60 sek vel varið í aðgangseyrinn. Þar er m.a. ný sýning á verkum súrealistans Max Ernst. Það fannst mér stórkostleg sýning og gæfi mikið fyrir nokkur verka hans sem þar voru.
T.d. fannst mér þetta verk bráðskemmtilegt

La Vierge corrigeant l´enfant Jésus devant tres témoins: André Breton, Paul Éluard et le peintre, 1926
Ísl.þýðing: Hin heilaga jómfrú flengir Jesúbarnið fyrir framan vitringana þrjá: André Breton, Paul Éluard og málarinn sjálfur, 1926. (Breton og Éluard voru vinir Ernst)